Su Covid, in sa variedade Omicron, curret e faghet a tìmere a su guvernu chi proat a lu fàghere arressare unu pagu cun medidas noas: sunt proibidos sos cuntzertos e sas festas a s’abertu finas a s’ùrtimu de s’annu; pro si leare unu cafè ritzos in su bancone de su tzilleri, dae como, est pretzisu a tènnere su documentu birde, chi serbit fintzas pro intrare in sos museos e in sas palestras. Pro andare a s’istàdiu, a su tzìnema e intrare in sos postales b’at bisòngiu de sa mascheredda Ffp2. In prus su documentu birde est bàlidu pro ses meses ebbia e non, comente a dae in antis, pro oto meses. In medas s’isetaiant s’òbligu vatzinale pro sos traballadores de sas amministratziones pùblicas e pro àteras categorias, ma non si nde est fatu nudda, ca non si nche est agatadu un’acordu intre sos partidos.
Pro neghe de custas medidas noas brincant sa majoria de sos ispetàculos ammanigiados dae sas tzitades sardas, mescamente dae s’Alighera e dae Nùgoro. Non b’at prus festas de agabbu de annu in pratza, e sos cuntzertos decrarados pro sas dies intre Pasca de Nadale e s’annu nou sunt istados annuddados. Si sunt sarvados petzi sos ispetàculos in sos teatros.
Si nos pariat chi custas festas podiant èssere normales, su guvernu nos at leadu custu bisu. De seguru però est mègius de s’annu coladu e, isperemus, chi siat peus de s’annu imbeniente.
(redatzione)
Leave a comment
Balla, dònnia borta chi si seus creendi de essi acanta a ndi bessì, nd’arribat un’àtera noa mala. Eus a acabai cras..