Sa de oe est petzi una cunferèntzia imprenta. Ma est cun oe chi sos rifletores sunt puntados in sa tzitade italiana de sas pedras. Matera, in pare cun sa marochina Tetouan, est capitale mediterrànea de sa Cultura e de su Diàlogu. Sa tzerimònia de abertura de sas atividades programmadas l’ant posta in calendàriu su 20 de martzu: unu palinsestu de apuntamentos e de fainas in intro de una «prataforma istratègica de diplomatzia culturale chi – leghimus in su situ de su ministeru italianu de sa Cultura – intèrpretat sa connoschèntzia non comente ornamentu ma comente “petròliu immateriale”». Duncas no una rassigna de eventos ebbia ma – a su chi narant – una mossa istratègica de soft power in ue sa cultura est una moneda diplomàtica pro cosire sos raportos intre sas ispundas de su mare nostru. Est craru chi s’Itàlia – interessada a pranos Mattei e a hub energèticos – tenet una visione sua. Ma nois in Sardigna ite visione tenimus? Cando a Matera la fadeint capitale europea de sa Cultura, su 2019, Nùgoro perdeit sa finale cun Parma pro èssere capitale italiana. In cussas dies fiat girende unu meme chi gasi faghiat: “A Matera i sassi, in Nùgoro sas predas”. A beru cherimus tzitades sardas capitales italianas de sa Cultura, pròpiu nois chi diamus dèvere àere una cultura a banda? Como Nùgoro no at pòdidu presentare sa candidadura pro lu èssere su 2027 petzi ca su 2024 fiat cummissariada. Ma, de cada manera, s’italianidade culturale de sa classe dirigente sua est essida a craru sas dies coladas cun sos tricolores deleddianos. E si imbetzes comintzaremus a punnare a sa dimensione euromediterrànea? Ca si Matera est su palcoscènicu simbòlicu de su diàlogu, s’ìsula nd’est su molu naturale. Prus mediterrànea chi no italiana in contu de istòria, geografia e destinos, sa Sardigna non podet abarrare ispetadora de una diplomatzia chi colat in sas rotas suas. Non de èssere capitale a mesu a pare cun àteras pro un’annu ebbia, nde diamus pòdere èssere un’ambasciada permanente. Cheret chi comintzemus a beru a faeddare de orizontes noos.
mauro piredda
Leave a comment