– de Salvatore Serra –
Marisa Sannìa, (Iglèsias 1947 – Casteddu 2008) est istada una cantautora e atora sarda. Connota pro sas cantzones sua de mùsica lèbia in sos annos sessanta, est istada intèrprete de cantzones de autore, atora, e, in fines, at cumintzadu un’istùdiu artìsticu chi nche l’at giuta a èssere una cantautora de gabbale in limba sarda.
………………………………………………………………
BIOGRAFIA
ANNOS SESSANTA
Marisa Sannia at cumintzadu sa carriera musicale sua a printzìpios de sos annos sessanta, comente boghe femminile de su grupu casteddaju, “I Principi”. Deretu s’est classificada segunda in unu cuncursu istatale pro boghes noas amaniadu dae sa Fonit Cetra. Su cuncursu l’aiant fatu in sa sede RAI de Casteddu in ue, acumpangiada a sa chiterra dae Roberto Casti e Pasqualino Cao, aiat presentadu sa cantzone de Salvatore Adamo “Perduto amor”: in sa giuria bi fiat su maistru Bruno Canfora. In s’ìnteri issa sighiat cun regularidade s’atividade sua de giogadora de basket, in antis in sa Karalis (dae ue est lòmpida a sa Natzionale Italiana chi at leadu parte in sos Campionados Europeos Juniores de su 1965, in Bulgaria), pustis in su CUS Cagliari Pallacanestro, a ue aiat truvadu su bonu de sa Karalis.
A pustis chi at bintu su cuncursu istatale pro boghes noas de sa RAI, at logradu unu cuntratu discogràficu de bator annos cun sa Fonit Cetra. Cando l’ant cramada a Roma, su talentu suo l’ant notadu Sergio Endrigo e Luis Bacalov; issos ant cumpostu sa prima cantzone sua “Tutto o niente”, promovende in su 1966 sa partetzipatzione sua a sa trasmissione televisiva Scala reale). In su matessi annu Marisa Sannia at lantzadu, cun sas maneras suas de pisedda a tipu Françoise Hardy o Gigliola Cinquetti, “Dai” de Canfora e Lina Wertmüller, proposta in Parigi in una puntada de su programma televisivu “Chez Vous”, e un’àteru bìculu cumpostu dae Endrigo, “Una cartolina”, cantzone de Paschighedda chi at logradu passagios medas in sa ràdiu e in sa televisione.
Sa renùntzia a su Festival de Sanremo de su 1967, in ue sa Font Cetra la cheriat fàghere partetzipare cun Gianni Pettenati, no l’at impedidu de fàghere parte de sos intèrpretes de s’albun “14 canzoni di Sanremo ’67”, in ue at propostu “C’é chi spera”, su bìculu cantadu in Sanremo dae Riki Maiocchi e Marianne Faithfull. Cun sa cantzone “Lo sappiamo noi due” (paràulas di Sergio Bardotti, mùsica de Endrigo), chi l’aiat proposta in un’ispetziale de sa trasmissione televisiva “Giovani”, Maria Sannia at partetzipadu in su 1967 a “Partitissima”.
De importu mannu, in sa crèschida sua de sa cantadora, est istada s’afirmatzione, in s’istiu de su 1967, in su Festivalbar, in ue, cun “Sarai fiero di me” s’est classificada in su de tres postos in su girone “Giovani” e at bintu su prèmiu de sa crìtica discogràfica. Pròpiu sa fama chi at logradu in sas garas canoras e in sas trasmissiones in sa ràdiu e in sa televisione l’at cunsentidu de retzitare in sa parte de protagonista, semper in su 1967, in duos “musicarelli”, chi in ambos duos bi fiat sa cantzone “Sarai fiero di me”: “I ragazzi di Bandiera Gialla” e “Stasera mi butto”, in pare cun Giancarlo Giannini.
In su 1968 s’est classificada segunda in su Festival de Sanremo cun “Casa bianca”, cumposta dae Don Backy e cantada cun Ornella Vanoni, chi at a bèndere prus de 500.000 còpias, e chi l’ant a pònnere in sa colunna sonora de sa pellìcula “Alfredo Alfredo” de Pietro Germi. In s’istiu de su matessi annu at torradu a publicare “Non è questo l’addio”, giai intzisa in pare cun “Sono innamorata (ma non tanto)”, proponende finas “Io ti sento”, bìculu cumpostu dae Armando Trovajoli pro sa colunna sonora de sa pellìcula de Dino Risi “Straziami, ma di baci saziami”, e “Colpo di vento”, sigla finale de su programma televisivu “Ciao mamma”. In su matessi tempus est divènnida testimòngia publitzitària de un’indùstria de durches de cussos annos. Semper in su 1968 at publicadu su primu 33 giros, “Marisa Sannia”, in ue b’at 10 cantzones. Non sunt mancados, in antis e a pustis de su passàgiu a sa domo discogràfica CGD (1969), àteros 45 giros de resessida comente “Una donna sola”, “Una lacrima”, “La playa/E se qualcuno s’innamorerà di me”.
Sunt medas, intre s’agabbu de sos annos sessanta e su cumintzu de sos annos setanta, sas partetipatziones a sas manifestatziones canoras, comente “Canzonissima”, dae su 1968 a su 1973, “Mostra Internazionale di Venezia” (1968, 1969, 1971), “Una Canzone per l’Europa in Lugano”, in su 1969, su “Festival de Varadero” in Cuba e “Expo ’70” in Osaka, ambos duos in su 1970, su “Festival di Spalato”, in su 1971, e torra su Festival de Sanremo in su 1970 e in su 1971.
Marisa Sannia at chertu finas isperimentare sa cantzone pop de autore, publichende cantzones de Endrigo, (chi l’at dedicadu su segundu album suo, “Marisa Sannia canta Sergio Endrigo e le sue canzoni”, 1970), Bacalov, Vecchioni, De Gregori, Lauzi, Minghi, De Moraes, De Angelis.
Gràtzias a sa bellesa sua, Marisa Sannia at tentu s’ocasione de essire in medas revistas illustradas, finas comente indossadora, fotomodella e, prus pagas bortas, intèrprete de fotoromanzos (s’ùrtima aparitzione in su mensile “Sogno Oscar”, n. 304, nche torrat a su 1973).
In s’interi si fiat cojuada cun su ritu tzivile in Casteddu, in cabudanni de su 1969. Marisa Sannia fiat àtea ma preferiat a si definire non credente: aiat naradu, difatis, de no èssere credente o interessada a chistiones comente s’esistèntzia de Deus o s’immortalidade de s’ànima: “Cadanu unu vivet comente cheret, sighit sa religione chi l’agradat”. “Deo so fata gasi e chie mi cheret bene mi depet atzetare comente so”. E galu: “Timo sa morte ca mi dispraghet chi totu agabbet pro semper, ma su contu de feduliu de s’inferru e de su paradisu mi ponet a rìere” [Intervista a su setimanale “Gente” 1973].
ANNOS SETANTA
A cumintzos de sos annos setanta, ca fiat benende mancu s’istajone canora sua prus assortada, Maria Sannia s’est interessada finas de teatru, leende parte in duos “musical” (“opere-folk”, lis naraiat s’ideadore issoro, Tony Cucchiara, chi issa l’aiat connotu in sos tempos de Settevoci) “Caino e Abele”, 1973 , trasmìtidu dae sa RAI in su 1974 , e “Storie di periferia” de su 1975. Pro su chi pertocat sa discografia, est su mamentu chi s’est interessada a su tema infantile, dae ue sunt nàschidos siat sa partetzipatzione, torra cun s’amparu de Sergio Endrigo, a s’album L’Arca “1973” (una regorta de cantzones de Vinícius de Moraes, de sos cales intèrpretat “Il gatto” e “Il pinguino”), siat unu 33 giros, semper de su 1973, de cantzones leadas dae sas pellìculas de Walt Disney, intituladu “Marisa nel Paese delle Meraviglie”. Su teatru e su tema infantile cumpensaiant, in cussos annos, s’infadu semper prus mannu de Marisa pro s’indùstria de sa cantzone.
In su 1976 at publicadu sa prima regorta sua comete cantautaora. In su matessi annu in Casteddu l’est nàshida una fìgia: est istada s’ocasione chi l’at cumbinta a renuntziare a sa ribalta, francu pro una trasmissione de Radio Sardegna “Ore 11.30” chi cunduiat in su 1977 cun Paule Pillonca ).
ANNOS OTANTA
A cumintzos de sos annos otanta at retzitadu in una parte minore in s’iscenegiadu televisivu “George Sand” afaca a Giorgio Albertazzi, Anna Proclemer e Paola Borboni, e est istada una de sas balladoras de sa pellìcula de Pupi Avati “Aiutami a sognare”. Su 1984 est s’annu de sa pagu cumplimentosa recuida a Sanremo cun “Amore amore”, chi l’at permissu, semper e cando, de leare parte in carchi ammentu televisivu de sa mùsica de su tempus coladu. A custu, però, at sighidu una rata longa de largania dae sas iscenas.
ANNOS NORANTA
In su 1993 at fatu sa torrada pùblica a sa mùsica cun unu discu in limba sarda in su cale at musicadu sos versos de Antiogu Casula, Montanaru, poeta sardu de sa prima medade de su Noighentos, cun sa cantzone “Sa oghe de su entu e de su mare”, chi l’at fatu bìnchere su “Premio Silanus” de su 1994. A pustis de pagu est finas torrada a su teatru (1994-1995) cun Albertazzi in su traballu “Memorie di Adriano – Ritratto di una voce”, regia de Maurizio Scaparro, intrende in parte de Maria Carta, presente in sas primas editziones de s’ispetàculu.
In su 1997 at intzisu su discu “Melagranàda”, in pare cun s’iscritore Frantziscu Màsala, in una regorta bogada dae “Poesias in duas limbas”. Su bìculu “Bellita bellita”, cumpostu dae issa, nche l’ant postu in sa colunna sonora de sa pellìcula de Piero Livi “Sos laribiancos/I dimenticati” (1999). In su 2002 at partetzipadu a “Canzoni per te”, cuntzertu amaniadu dae su “Premio Tenco“, e a su discu fatu pro ammentare a Sergio Endrigo, interpretende “Mani bucate”.
A PUSTIS DE SU DUAMÌGIA
In su 2001 est essida sa regorta in cd “Canzoni per te – dedicato a Sergio Endrigo” in ue, in mesu de sas àteras, Marisa Sannia intèrpretat sa cantzone “Mani bucate”, giai publicada in 45 giros in su 1965. Marisa Sannia, infatis, at leadu parte in sa Rassinna de su Club Tenco in su 2001 (registratzione de su 26.10.2001).
In su 2003 est essida sa de tres regortas in limba sarda “Nanas e janas”, cun paràulas e mùsicas inèditas iscritas dae issa etotu. Custa chirca noa poètica e musicale est resumida in su recital “Canzoni tra due lingue sul cammino della poesia”, presentadu in rassinnas de importu italianas e èsteras comente “La Notte dei Poeti” in s’anfiteatru romanu de Nora, su Festival de Taormina e “Roma incontra il mondo”. In ghennàrgiu de su 2006 at leadu parte in su cuntzertu fatu pro ammentare a Sergio Endrigo chi fiat in pessu mortu, intituladu “Ciao Poeta” e collidu in unu cd/DVD apòsitu, interpretende “La rosa bianca” e “Come stasera mai”.
In su 2007 Marisa Sannia at leadu parte in su Festival “Mille e un Nuraghe”, edizione IV , in Pèrfugas, in ue at propostu poesias de Montanaru e Frantziscu Màsala, una prosa lìrica de Giulio Angioni (Il mare) e, in anteprima, unos cantos bìculos de s’ùrtimu traballu discogràficu suo chi at a essire pòstumu. In su cuntzertu l’at acumpangiada in su pianu e in sa chiterra s’arrangiadore Marco Piras.
S’ùrtimu traballu suo, publicadu pòstumu e distribuidu dae sa Felmay in santandria de su 2008 (cun un’anteprima a su “Premio Tenco“), est “Rosa de papel”, dedicadu a sa vida e a sa poesia de Federico García Lorca. Est una regorta de 12 cantzones, chi sa cantadora bi teniat in manera particulare, chi trasponet in mùsica unas cantas lìricas de su periòdu juvenile de su poeta ispagnolu. In mesu de sas cantzones de sa regorta, in prus de “Rosa de papel”, b’at “El nino mudo”, “Laberytos y espejos”, “Aguila de los ninos”.
Marisa Sannia tenet in s’ativu medas ma medas partetziptziones in traballos de àteros artistas e unas cantas cumpositziones suas chi sunt istadas interpretadas finas in Ispagna dae sa cantadora Ester Formosa. Comente autora at bintu, in su 1997, su “Festival della Canzone d’Autore” per “Bambini (Bimbo Star, categoria Ragazzi”, cun su bìculu “Stella che non brilla”.
Marisa Sannia est morta su 14 de abrile de su 2008 a 61 annu, istruncada in 6 meses dae unu tumore a su fìgadu. In su mese de austu de su matessi annu ant cunferidu a sa memòria sua su reconnoschimentu de su prèmiu “Maria Carta“. In cabudanni de su 2009 s’artista Maria Lai at dedicadu a sa figura de Marisa Sannia, de sa cale fiat amiga, un’eventu ispetzale in sa pratza de sa “Stazione dell’arte” in Ulassai, cramende su maridu e sa fìgia de s’artista.
Leave a comment