“Sa mancàntzia de dutores ispetzialistas oe est su problema prus mannu de su sistema sanitàriu, a livellu regionale e natzionale. In mancàntzia de règulas noas e normas ispetziales, che a cussas adotadas pro s’emergèntzia COVID, chi permitent a sas regiones prus libertade, semus custrintos a valutare calesisiat solutzione pro garantire a sos tzitadinos servìtzios in su tempus e rispostas prontas”.
Custas sas paràulas de s’assessore regionale de sa sanidade, Mario Nieddu, chistionende de su bandu de s’ARES pro afortiare sa retza de s’Emergèntzia-Urgèntzia cun s’afidamentu a operadores ispetzializados de sa fornidura de su Servìtziu Dotore de Guàrdia in 12 presìdios in s’ìnteri de s’istade.
“Sa mancàntzia de ispetzialistas – sutaliniat s’assessore – pertocat totu sas disciplinas, ma s’Emergèntzia-Urgèntzia est una de cussas ue custu problema es prus grave. A s’ùrtimu cuncursu pro assùmere dotores pro sos Pronto Sucursu ant partecipadu 19 ispetzialistas pro 20 postos a disponimentu. In prus, fint belle totus dotores istruturados, est a nàrrere giai in servìtziu in sos ospidales nostros. Non s’est privatizende sa sanidade pùblica, chie crìticat sos issèberos nostros lu faghet sena resone – nat s’assessore Nieddu – dae s’acabbu de su 2019 a oe amus autorizadu 101 cuncursos in sanidade, 60 acabbados, 31 in caminu e 10 galu a aviare”.
Mariantonietta Piga