Semper nd’ant fatu in custa terra e gasi bi l’ant a sighire. Màssimu como chi s’annestru bèllicu est funtzionale a unu cuntestu istòricu in ue sa gherra est una de sas optziones in campu continentale de sas relatziones internatzionales. Duncas, bi semus torra, ca est comintzada s’editzione 2025 de sa chi li narant sa prus esertzitatzione annuale manna de sa Difesa in àmbitu marìtimu, est a nàrrere Mare Aperto. Sas operatziones las at pranificadas e las est conduende su Cumandu de s’Iscuadra navale. Unos cantos nùmeros: 120 sos mezos impreados cun unidades navales, sommergìbiles, aèreos, elicòteros e veìculos sena pilota subàcueos, aèreos e de terra; 6mìgia e barda sos militares interessados de 8 paisos afiliados a sa Nato; 21 sas marinas istràngias (a banda s’italiana) cun osservadores presentes in loco. Sos giogos de gherra sunt programmados in su Mediterràneu tzentrale (e duncas fintzas in sas abbas e in sos polìgonos sardos) e in lista bi sunt sos cumponentes de s’esèrtzitu, de s’aeronàutica, de sos carabineris, de sa guàrdia de finàntzia e de sa capitaneria de portu. A sos repartos operativos de sa marina militare lis tocant operatziones dìligas comente sa gestione de sas minetzas chìmicas, biològicas, radiològicas e nucleares (cun una postatzione mèiga avantzada a s’àtera ala de su Tirrenu pro simulare sa risposta a un’emergèntzia sanitària pro more de una contaminatzione chìmica. Dae oe a su 30 de martzu 28 su grupu navale de isbarcu anfìbiu de sa marina militare faghet tapa in Casteddu Cagliari cun sa nae Trieste in su molu Rinascita, sa nae San Giusto in su molu Ichnusa e sas naes San Giorgio e San Marco in su molu Sabaudo. «In custa editzione 2025 punnamus a afortire de prus sa prontesa e sa coesione de sas fortzas pro garantire sa segures marìtima e tutelare sos interessos natzionales», at naradu s’ammiràlliu de iscuadra Aurelio De Carolis, cumandante in capu de s’iscuadra navale. Sunt gioghende a sa gherra. Ma finas a cando at a èssere unu giogu?
mauro piredda
immàgine marina.difesa.it