Sa cantadora de Triei Manuela Mameli proponet in custu mese de nadale una versione sua de sos Goccius po sa Nàschida de Gesu Cristu.
Mameli at chertu presentare custu cantu paralitùrgicu in ocasione de sas festas de Pasca de nadale de ocannu pro marcare s’apartenèntzia culturale a sa terra sua e finas pro mantènnere su cuntatu cun su pùblicu, bidu ca sas proibitziones de su guvernu ant firmadu sas atividades in palcu.
S’artista ogiastrina cantat massimamente jazz ma no at mai tentu problemas a s’acostare a sas melodias chi at semper connotu dae sa pitzinnia.
A pustis de su diploma in su conservatòriu de Casteddu s’est prefetzionada in sos seminàrios musicales de Siena Jazz. At cantadu e traballadu, semper comente intèrprete jazz, finas in Isvètzia, Rùssia e Tzina.
Custa versione est frutu de sa collaboratzione cun sos sonadores a chiterra Massimo Satta, de Casteddu, e a violinu, su lombardu Andrea Dall’Olio.
Satta at partetzipadu a sos cursos de sa Università della Musica e de su Saint Louis College of Music de Roma e at collaboradu cun artistas famados, che a Mogol e a Antonella Ruggiero.
Dall’Olio s’est diplomadu in su conservatòriu Giuseppe Verdi de Milanu e faghet parte de su grupu Domo Emigrantes.
De sos Goccius po sa nàschida de Gesu Cristu ddo’est finas su vìdeu.
(redatzione)
Leave a comment