de Salvatore Serra
Semper de prus si bidet in sas butegas gente paghende cun su telefoneddu, acurtziende·lu a unu TPV o datàfonu cumpatìble. Sunt sos chi lis narant pagamentos “contactless”, est a nàrrere, sos chi si faghent “sena cuntatu”. E sa popularidade issoro semper prus manna si bidet cun craresa in sos datos: mancari su pagamentu in contante siat galu su chi sa gente pràticat de prus, sighidu dae sa carta, unu 25% de usuàrios impitat giai sos dispositivos mòbiles. Sa tecnologia chi lu permitit est su NFC (Near Field Communication, dae sa sigla in inglesu), chi est su matessi de sas cartas de identidade noas, de sas cartas de trasportu pùblicu de unos cantas tzitades o de sas craes pro intrare in tzertos fràigos. Est una tecnologia inalàmbrica chi permitit de connetare duos dispositivos a una distàntzia curtza meda; sigomente bisòngiat de los tocare pro los fàghere funtzionare, est praticamente impossìbile chi calicunu intervèngiat in sa tràmuda de datos a distàntzia, e duncas est unu mètodu seguru meda.
PRIMU, IN SU ‘SMARTPHONE’
In sos “telefoneddos intelligentes” sa tecnología NFC la sunt impitende dae meda — su primu a la pònnere est istadu su Nexus S de Google in su 2010—, mancari s’utilidade sua initziale esseret bastante diferente dae sa de como: serviat pro vinculare dispositivos (pro nàrrere, su telefoneddu cun sos auriculares) cando si poniant in cuntatu, o pro imbiare archìvios comente alternativa a su Bluetooth. Cando si sunt isvilupadas sas aplicatziones de portafòlliu virtuale che a Google Pay o Apple Pay (e totu su sistema de seguresa chi cumportant) est istadu possìbile a las impitare finas pro pagare.
Pustis ant cumintzadu a impitare custa tecnologia finas in sos smartwatches o relògios intelligentes, e, a dies de oe, su bonu de sos modelllos de sas marcas printzipales sunt cumpatìbiles cun sos pagamentos sena cuntatu: Apple Watch, Fitbit Sense, Samsung Galaxy Watch, Xiaomi Mi Watch. Su sistema est su matessi: s’aberit s’aplicatzione de pagamentu, si sèberat sa carta si bi nd’at prus de una cunfigurada, e s’acùrtziat a su datàfonu.
In fines, bi sunt sos aneddos intelligentes, chi si sunt faghende semper de prus populares e ant incluidu finas custa optzione. Mancari tzertos siant tzentrados meda in sa monitorizatzione de s’atividade, bi nd’at àteros, che a Rikki o Cnick, chi sa funtzionalidade printzipale issoro est sa de fàghere pagamentos.
Leave a comment