Mandra Antine, Tiesi: sa tumba pintada

    –     de Sarvadore Serra    –

Su giassu archeològicu de Mandra Antine, Tiesi, est formadu dae 4 domus de janas.  Sa sepultura prus de importu  est sa tumba  III o “tumba pintada”, connota pro sa rafinadesa  de sos motivos simbòlicos e architetònicos  chi frunint cun chentu colores  sa tzella majore. L’at iscoberta  Èrcole Contu in su 1961. Est  formada  dae 4 ambientes  cumpostos a  “T”: un’antitzella ellìtica  minore (larg. m 1,00; prof.  m 1,50) nche giughet  a sa càmera manna  retangulare (larg. m 3,60; prof. m 1,60) chi, in sas pinnas postas in sas duas alas,  s’aberint  sas intradas  de duos ambientes ellìticos (larg. m 1,10; prof. m 1,66). In s’ala de fundu  de s’ambiente prus mannu  b’at una cumpositzione cumplessa  chi prenat totu sa pinna: est formada dae una ghenna farsa tzentralizada, incuadrada dae una fasca  pintada in ruju, chi subra e a costàgiu  b’at 5 bandas orizontales pintadas. Sa banda de susu, in cuntatu cun sa bòveda, est pintada in colore de antratzite; sa segunda  banda  est in colore de senòbida.  Prus in giosso  si disponent, subra  e a costàgios de sa ghenna farsa, tres bandas  cun puntas incurviadas  cara a susu, pintadas de ruju. Dae sa banda mesana pendent  6 discos nieddutzos (3 pro parte), cando chi, in sa matessi lìnia, àteros duos discos (unu pro parte) pendent  dae duos ricuadros imbarados  a costàgios de sas puntas de sas duas bandas de susu. Sa parte de susu de sa ghenna farsa est frunida in sa parte de mesu cun un disinnu  a 6 triàngulos pintados in nieddu. Una sìngia ruja curret in pees de sa pinna.  Sa cumpositzione rapresentat  un’ischema taurinu, cun sa conca (ischematizada  dae sa ghenna farsa de mesu) e sos corros (rafigurados dae sas bandas  cun sas puntas incurviadas cara a susu) de s’animale.  Su sinnificadu  de sos globos pèndulos est una cosa chi galu sos istudiosos nde sunt arresonende: diant pòdere èssere sìmbulos  apotropàicos, ma sos prus pensant  chi sunt discos solares chi b’intrant  cun sos cultos de s’abba o de sa fertilidade.  Una cumpositzione decorativa de sa matessi casta si pensat chi esseret pintada in sa pinna de s’àtera ala, ma sos motivos figurativos, mantesos petzi  in parte, si bident pagu.  Est curiosa fintzas sa decoratzione de sa bòveda de sa tzella, chi mustrat pranos inclinados chi in pessu si bident: sa bòveda reproduit  a relevu negativu sa biga de cresta e sas bigas trasversales (10 a cada ala) de sa cobertura a duas abbas. Sa bòveda, tando, resurtat cumpartzida in 20  ricuadros a relevu negativu singiados  de ruju. In intro de sos ricuadros b’at, in colore de avòriu  subra de unu fundale nieddu, àteros elementos simbòlicos: ispirales, pseudoispirales, mesu chircos e bandas inclinadas simples e dòpias.  In su pamentu, unu pagu a un’ala, b’at unu foghile inghiriadu  dae 4 chircos cuntzèntricos isculpidos e  cun una cupita  in mesu.
Sa tumba est de su Neolìticu finale – Eneolìticu.

Bibliografia
E. Contu, “Tombe preistoriche dipinte e scolpite di Thiesi e Bessude (Sassari)”, in Rivista di Scienze Preistoriche , XIX, 1964, pp. 233-263;
M. L. Ferrarese Ceruti, “Domus de janas in località Molimentos (Benetutti, Sassari)”, in Bullettino di Paletnologia Italiana, XVIII, 76, 1967, pp. 67-135, figg. 1-42;
G. Lilliu, La civiltà dei Sardi dal Neolitico all’età dei nuraghi, Torino, E.R.I., 1975;
E. Castaldi, Il “culto” del toro nella preistoria della Sardegna ed il problema delle tre cavità sull’alto dei prospetti delle tombe di giganti”, in Archivio per l’Antropologia e l’Etnologia, CVI, 1976, pp. 439-458;
G. Tanda, Arte preistorica in Sardegna. Le figurazioni taurine scolpite dell’Algherese nel quadro delle rappresentazioni figurative degli ipogei sardi a “domus de janas”, Sassari, Dessì 1977, p. 12;
G. Tanda, L’Arte delle domus de janas nelle immagini di Jngeborg Mangold, Sassari, Chiarella, 1985, pp. 148-152;
G. Tanda, “Thiesi Loc. Mandra Antine”, in I Sardi. La Sardegna dal Paleolitico all’età dei nuraghi, cuidadu dae E. Anati, Milano, Jaca Book, 1984, pp. 320-321.

Ligàmenes:

https://www.youtube.com/watch?v=mub6NSibHVQ http://www.sardegnacultura.it/j/v/253?s=24699&v=2&c=2510&c1=2611&visb=&t=1

https://it.wikipedia.org/wiki/Necropoli_di_Mandra_Antine

https://www.tripadvisor.it/Attraction_Review-g1169021-d10717139-Reviews-Domus_Mandra_Antine-Thiesi_Province_of_Sassari_Sardinia.html

http://www.paradisola.it/articoli/pillole-di-sardegna/2541-thiesi-tomba-di-mandra-antine