Su 2 de trìulas a sas 20,30 in su Teatru Verdi de Tàtari est in programma su ballete Lo Schiaccianoci de Čajkovskij. Cheret èssere un’ammentu de Jaguše Vrankova (in foto), nàschida in su 1933 e morta deghe annos a como. Ex prima ballerina de su Teatru Natzionale de s’Òpera de Praga, aiat fundadu pròpiu in Tàtari sa prima e ùnica iscola de setore reconnota dae su Ministèriu de s’Istrutzione.
Sa posta in iscena est a incuru de s’iscola etotu, sa DanSoul Studio, dirìgida dae Sharon Podesva, sa neta de Vrankova. At a ballare finas Angelo De Serra, chi dae dischente de Podesva est a sa fine intradu in sa Complexions Contemporary Ballet de Nova York. Cun issu Flavia Pisuttu, chi dae sa DanSoul at passadu s’auditzione a su segundu cursu pro ballerinos professionistas de s’iscola de dantza de su Teatru de s’Òpera de Roma.
(redatzione)
Leave a comment