de Giagu Ledda
Apo lèghidu in sos giornales italianos sa polèmica a pìtzu de sos litzeos classistas.
“Il basso numero di stranieri, di disabili o di studenti svantaggiati garantisce un corso di studi libero da ritardi, impacci”.
“Il basso numero dei figli dei portieri dei condomini garantisce l’omogeneità culturale tra gli studenti”.
“Il contesto socio-economico e culturale complessivamente di medio- alto livello e l’assenza di gruppi di studenti con caratteristiche particolari dal punto di vista della provenienza culturale ( come, ad esempio nomadi o studenti provenienti da zone particolarmente svantaggiate) …
Custas sunt unas cantas frases, intre àteras, chi sunt servidas a sas iscolas pro si publitzizare.
Non m’ant meravilliadu.
Fiat sa prima die de santugaine de sos primos annos ’60. “Il resto in terza C, in fondo al corridoio”.
Custu amus intesu a sa fine de s’apellu de sos litzeales noos, sa prima die de iscola in su Litzeu Sientìficu G. Spano de Tàtari. Non nos ant mancu numenados, fiamus “su restu”, una cosa agiunta, chi forsis non s’isetaiant, fiamus una crèschida abnorme, no isetada nen disigiada, una genia de corpus estràneu in s’organismu de cussu litzeu, chi pro sa prima borta teniat una setzione C. E s’àula in fundu a su passadissu non fiat un’àula destinada a tènnere pro totu un’annu una classe, un’àula cale si siat, nono, fiat sa “Aula di Disegno” cun bancos e cadreas diferentes dae sos de sas àteras àulas.
Semus intrados e nos semus abbaidados in cara: fiamus totus o de su Monte Rosello, de s’Iscola Mèdia nùm. 4 comente deo, o de sas biddas, cun s’agiunta de carchi ripetente. Giuliano a ti l’ammentas; Umberto a ti l’ammentas? Sos primos professores fissos los amus tentos su mese de nadale e a ghennàrgiu, coladas sas festas. Ogni die intraiant e essiant professores chi aiant acabadu s’oràriu in sas classes issoro e bos podides immaginare duncas sa gana chi nde teniant de fàghere letzione in una classe che sa nostra sena perunu vìnculu didàticu continuativu cun issos. O puru beniat carchi suplente, e mi nd’ammento una, de italianu, chi una die a unu cumpàngiu meu li faghet: “Mi’ che ti sono vedendo!”. Sa matessi chi si nos intendiat faeddende in sardu, nat chi fiamus pastores.
Cussu perìodu de ausèntzia didàtica at tentu però una parte positiva: nos est servidu a nos afortiare su corpus e s’anima ca, in mancàntzia de professores de lìteras, de matemàtica o de sièntzia, tenìamus belle cada die su de educatzione fìsica e su de religione.
Tando fiamus nois sos furisteris, sos albanesos, sos nieddos, sos fìgios de sos porteris de sos palatzos, sos fìgios de sos traballadores, sos “studenti con caratteristiche particolari dal punto di vista della provenienza culturale”, iscrient sos litzeos de oe.
Sunt colados prus de chimbanta annos e s’iscola italiana de como, leghende custos artìculos de giornale, mi paret chi non siat cambiada meda: est sa fìgia de s’iscola de cando b’andaia deo. Su classismu e su ratzismu suos non sunt tzertu una novedade, benint dae a tesu.
Sas frases chi apo tzitadu in antis sunt de sa publitzidade de su Liceo Visconti de Roma e de su D’Oria, s’iscola prus famada de Gènova, e mi diat pràghere a ischire cantos pitzinnos e pitzinnas in su 1938, in cussos matessi litzeos, a pustis de sas leges ratziales, non sunt pòdidos intrare pro èssere ebreos; e cantos professores sunt istados obligados a abbandonare sa càtedra issoro, semper pro èssere ebreos.
Cosas meda comintzant cun frases a s’aparèntzia nèutra e finint de sa manera chi nemos s’isetat.
Leave a comment