Redatzione
Erisero su Guvernu at atzetadu s’òrdine de traballos pro sa die de sa deputada de su Partidu Democràticu Romina Mura, chi aiat pedidu de incluire fintzas sa Sardigna in sa norma e in sos finantziamentos istatales chi pertocant sas trasmissiones radiofònicas e televisivas fatas in limba sarda. Comente faghent in sa provìntzia de Bolzano, in sa provìntzia autònoma de Trento, in sa regione autònoma de sa Badde de Aosta e in sa regione autonomia de su Friuli Venètzia Giùlia pro sas limbas tedesca, ladina, frantzesa e islovena.
Sa deputada matessi in una nota ammentat chi sos sardos, cun prus de unu millione e mesu de persones, sunt sa minoria linguìstica prus manna de s’Istadu italianu e chi sa limba sarda est amparada dae sa lege 482 de su 1999, iscrita in aplicatzione de s’artìculu 6 de sa Costitutzione. Mura at sutaliniadu fintzas chi pro more de sa particularidade sua, sa Sardigna giughet giai unu pranu linguìsticu, ma chi a manera diferente dae sas àteras regiones e provìntzias cun àteras minorias linguìsticas, sa Sardigna bogat su dinari dae sa finantziària regionale e chi duncas sos notitziàrios radiotelevisivos e sos programmas in limba sarda, mancari ispartzinados dae su servìtziu pùblicu de sa Radiotelevisione Italiana, non sunt finantziados dae s’Istadu comente diat chèrrere sa lege.
Est beru chi semper e cando un’òrdine de traballos pro sa die no est nudda, ca su chi serbit est s’impignu de sa Rai in su cuntratu de servìtziu cun s’istadu. Ma est fintzas beru chi Romina Mura, deputada de su PD e fintzas sìndigu de Sàdali, bene at fatu a pònnere sa chistione in su Parlamentu, mescamente pro sos resurtos chi nd’at bogadu e ca at postu a caminare una faina de importu pro sa chistione linguistica.
Su chi però ponet dudas mannas est sa paga faina de s’Assessoradu a sa Cultura e de sa Giunta, ca in tres meses de guvernu galu nudda b’at essidu a campu.
Si pro sa limba sarda si movet su parlamentu de Roma in antis de sa giunta sarda, est duncas sinnale craru chi carchi cosa chi non torrat in sa polìtica linguìstica regionale b’est.
O no est chi presidente e assessore non nde ischiant nudda ca sos ufitzios no ant sinnaladu una cosa de importu gasi?
Leave a comment