Duos miliones e mesu de èuros declarados pro su bilantzu 2016. Custu est su chi at comunicadu s’assessora regionale de sa cultura Claudia Firino in sa cummissione cultura carchi die como. Ma Paolo Zedda, cussigeri regionale Rossomori, babbu mannu de sa fatzione de sos brigadores campidanistas, no est cuntentu. Segundu cantu relatat su giornale in linia Casteddu On Line, s’est chesciadu prus o mancu narende “Depimus fàghere de prus ca ispendimus petzi sa metàde de carchi annu como”.
Si cumprendet chi est una tàtica cara a s’aprovatzione de su bilantzu pro leare prus dinare possìbile, ma a ogni manera est finas un’ammissione fortzada chi calicuna cosa no andat in sa polìtica linguìstica regionale.
No est una crìtica a s’assessora Firino, sende chi sos duos polìticos ant traballadu paris in custos annos leende ognunu a sas ideas e a sas initziativas de s’àteru. Duncas, pro como, sa responsabilidade est comuna, ma fiat gasi giai dae su 2014, dae cando Firino e Zedda aiant leadu sa prima detzisione de polìtica linguìstica de custa legisladura: a nche bogare, cun iscùsias burocràticas, a Pepe Coròngiu, diretore-militante-espertu istòricu de s’ufìtziu.
Dae tando a como sas cosas però non sunt andadas bene meda. S’assessoradu e su servìtziu nou no ant decolladu. Su mundu linguìsticu est semper prus partzidu. S’ostilidade contra a Corongiu e finas contra a sa LSC at postu contra a sa Regione una parte manna de militantes e de osservadores. Forsis cussa prus atenta a sa chistione. Totu custu at cajonadu sa nàschida de su CSU, assòtziu chi movet semper gente meda, e chi faghet un’opositzione sighida, pibinca e rebesta ismanniende s’impressione negativa subra a sa polìtica linguìstica. Ma CSU faghet finas propostas culturales positivas (sa festa de sa limba, sa die, su cussìgiu d’europa, Zakaria Tamer e Don Chisciote) cosa chi faghet risaltare de prus s’immobilismu de sa burocratzia regionale.
In sa majoria de guvernu, egemonizada dae sos acadèmicos, b’at pagu aficu a sa limba e custa divisione interna a su ML impedit a Zedda de pensare a una pressione ‘dae foras’ pro l’agiuare. Podet contare subra pagu apògiu in Cussìgiu Regionale. Dae cando Arbau si nd’est andadu est isoladu in s’àula. S’arriscu est chi su tempus colet sena fàghere nudda de importu. Firino est proende a giocare sas cartas de Tore Cubeddu e Antonello Garau, imprendidores linguìsticos: amus a bìdere ite renèssent a fàghere.
Bi diat chèrrere prus fortza e unidade de custu mundu linguìsticu, ma sas divisiones abarrant. In antis sos arregulistas atacaiant semper a Coròngiu. Como su CSU atacat a chie guvernat. E Firino e Zedda sunt in dificultade finas a s’ammisione chi, annos in dae in antis, sas cosas andaiant mègius. Nessi pro su dinare. E CSU est semper paradu a fàghere a manera chi sas mancàntzias siant craras a totus.
E in cussos 2 miliones e mesu non totu est pro sa limba…antzis…b’at de contare chi b’est sa die, sas traditziones populares e sos personàgios illustres. Cultura in antis de sa limba, comente agradat traditzionalmente a su diretore generale Antonina Scanu e a sos acadèmicos.
(redaz)
Leave a comment