– de Giuseppe Pepe Coròngiu –
Pustis totu sas promissas de interventos megalàticos in s’iscola pro sa limba sarda (totu paristòrias), eris sa Regione annùntziat, sena birgòngia, chi finas a como no at fatu nudda e chi intro pagas dies at a fàghere pagu. In unu comunicadu si narat chi intro su mese de làmpadas at a essire su bandu pro sa lege 3 de su 2009 (sardu veiculare e curricolare) cun sa dotatzione de 450 mìgia èuros e sa promissa de un’àteru bandu pro sos materiales didàticos.
Sa prima cosa curiosa est custa: ma pro ite fàghere s’ennesimu annùntziu pro una cosa chi si depet fàghere? Faghe-la e bo. Mancant 10 dies a finire làmpadas…
Sa segunda est chi su tantu de dinare postu no est meda, est ‘ordinàriu’ e finas pagu. A pustis de sas promissas fatas de interventos cuntzentrados subra s’iscola, a pustis de milionadas ghetadas in sa mesa de sos bisos che nitzola (10, 5, 3, unu..e), a nàrrere chi b’at a disponimentu 450 mìgia èuros est una delusione manna. Difatis, est su matessi tantu de su 2013 chi no aiat pretesas de intervènnere in sas iscolas ebbia, ma istantziaiat prus in generale àteras summas in àteros setores. Si custu est a pònnere s’iscola che a ‘setore istratègicu’ comente aiant promissu assessores e cussigeris…
Sa de tres est chi si bident giai de a tesu sos problemas tècnicos chi ant a fàghere àteros dannos. Sa chistione de sas iscolas maternas in ue s’ant fàghere progetos folclorìsticos in italianu e su sèberu de materiales didàticos pluridialetales e non in istandard comente in cada minoria normale. Su mundu de iscola (italiana) est òstile a su sardu e bi cheret manera e abbistèntzia pro intrare…
Sena contare chi ant frimmadu sas letziones de sardu pro un’annu e duncas giai fatu unu dannu mannu chi de seguru custu interventu non sanat.
Duncas, unu comunicadu difensivu su de eris, de gente chi est in afannu, chi ammustrat sa dificultade polìtica, ma finas cussa tècnica de s’assessoradu de sa pùblica istrutzione e de su chi abarrat de su servìtziu chi si òcupat de limba sarda.
Ma como isetamus a bìdere si nessi custu annùntziu at a èssere sighidu dae fatos. Ca, cun curpa manna de sos polìticos, de sas dirigentes de s’assessoradu e de totu cussos chi, pro òdiu e interesseddos de pagu contu, ant lassadu ispèrdere sa richesa de custos ùrtiimos deghe annos, sas cosas non sunt postas bene.
Comente si narat in italianu ‘la montagna ha partorito il topolino’.
E gasi depiat èssere ca su disinnu fiat cussu de frimmare sa chistione linguìstica a pagu a pagu istrachende sos pagos chi la sighint. E ponende gente incumpetente in ue serbit professionalidade. Sighende gasi sos dannos de custos seighi meses ant a èssere impossìbiles de acontzare comente si bidet dae sos cumentos populistas e antilnguìsticos de su Facebook de s’Unione Sarda.
S’opinione pùblica est comintzende a non bìdere prus cun favore sa polìtica linguìstica ca non bi sunt prus cuddos bellos messàgios positivos de unos cantos annos a como. E custu at a fàghere semper prus tostu a bi investire. Bellu resultadu in mancu duos annos. Bravos.
inoghe su comunicadu de sa Regione
http://www.regione.sardegna.it/j/v/25?s=283123&v=2&c=220&t=1
Leave a comment