Beatriz Quintana Coro at bintu sa de tres editziones de su Prèmiu Enriqueta González Rubín de narrativa pro giòvanos in asturianu, amaniada dae sa Viceconseyería de Cultura, Política Llingüística y Deporte. S’òpera binchidora est unu romanzu curtzu chi si narat «La tráxica hestoria de cómo Abraham mató la música» (S’istòria tràgica de comente Abramu at mortu sa mùsica). In custu contu s’autora ammesturat su gènere giovanile cun s’horror, ponende ambientatziones istòricas e geográficas diferentes. Sa giuria de su prèmiu at seberadu s’òpera pro «s’originalidade de s’argumentu e sa narratzione lèbia e bene sestada chi brindat unu biàgiu temporale a traessu de sa mùsica classica».
Sa giuria fiat formada dae: Aymara González Montoto, tradutora e professora; Gonzalo Llamedo Pandiella, iscritore e professore; Tamara Collar Rodríguez, professora; Sol Inca Turbón, iscritora; Andrés Fernández Menéndez, s’autore chi at bìnchidu s’ editzione anteriore. Su diretore generale de Acción Cultural y Normalización Llingüística, Antón García, at fatu a presidente e Laura Marcos, filòloga de su Serviciu de Planificación Llingüística, at fatu a segretària.
Su Prèmiu Enriqueta González Rubín cunsistit in 3.000 èuros e in sa publicatzione de s’òpera binchidora. In prus previdet chi s’autore o autora intret s’annu a pustis in su tzircùitu culturale «Autores nel camín». Su Guvernu de Astùrias at promòvidu su prèmiu in su 2021 pro pònnere in contu sa produtzione literària de sas boghes noas de sa literadura in limba asturiana. In sas editziones anteriores ant premiadu sos iscritores Blanca Fernández Quintana e Andrés Fernández Menéndez.
Beatriz Quintana Coro (Riaño, 1995) at cunsighidu sa làurea de Llingües Modernes y les sos Lliteratures in s’ Universidade de Oviedo e traballat comente profesora in s’iscola segundària. Comente iscritora at collaboradu cun sa revista «Lliteratura», editada dae s’Academia de la Llingua Asturiana, e s’annu coladu at bintu sa de sete editziones de su cuncursu «Entaína a escribir» de contigheddos improvisados. Leat parte in sa tertulia literària «Malory» de L’Entregu.
(sa redatzione)
Leave a comment