Eris in unu teatru de Gallarate in Lombardia, ant fatu un’adòbiu a subra de sa reimmigratzione. Sos organizadores fiant sas fortzas prus de dereta de Europa, in una comuna ghiada dae unu sìndigu de sa Lega, chi est su partidu de su Ministru de s’Internu Piantedosi. Su cuntzetu est fàtzile: onni persone chi no est originària de su Paisu de riferimentu, no est biancu, non faeddat comente printzipale sa limba de s’Istadu e no est cristianu si diat pòdere catzare dae su Paisu e torrare a mandare in su logu dae ue est bènnidu. S’idea violat prus de una lege de sa Costitutzione italiana e de su deretu internatzionale e pro custa resone in Gallarate ativistas de manca ant protestadu, in Milanu sas opositziones ant ammanigiadu una manifestada sustènnida dae su sìndigu e b’at àpidu fintzas un’atzufu intre politzia e carchi ativista.
Sos polìticos, mescamente de su grupu de Salvini, ant amparadu sa riunione cun su printzìpiu de sa libertade de opinione e de pensu, fintzas si un’idea polìtica andat contra a sas leges e contra a sos deretos internatzionales. In su mentres sa Meloni e Fortza Itàlia istant a sa muda e lassant fàghere. Sa chistione paret unu capìtulu de sa cuntierra chi dae meda girat in sas sotziedades democràticas: si podent lassare girare fainas e meledos chi andant contra a sa democratzia?
Su problema est chi custa cuntierra inoghe s’intritzat cun s’atividade de su guvernu Meloni chi non cheret amparare, e antzias atacat, sas opiniones de sos àteros. Dae s’inghitzu de su caminu suo at pesadu sas chescias de sa RAI chi non renessiat prus a fàghere informatzione, ca bi fiant tropu impèllidas a sighire sos cumandos de sa Presidente de su Cussìgiu. Rannucci, sa ghia de su programma Report, at denuntziadu un’ambiente pesosu de minetza. S’iscàndalu Paragon (incarca inoghe pro lèghere) at ammustradu su cuntrollu de sos servìtzios a s’imprenta chi non si pinnigat. Ùrtimu, ma non grae de mancu, sa chistione de Daniele Fabbri: unu còmicu chi in unu podcast brullat a subra de sas ofesas sessista chi ant fatu a sa Meloni, cundennende·las, e proponende de las cambiare cun paràulas de sa pitzinnia (incarca inoghe pro nd’ischire de prus): sa Presidente de su Cussìgiu l’at denuntziadu.
E tando su problema abarrat abertu: bisòngiat dare logu a sos intollerantes?
Gabriele Tanda
Leave a comment