Foto leada dae su situ ufitziale de su Rassemblement National
Marine Le Pen no at a pòdere partetzipare a sas eletziones presidentziales frantzesas in programma in su 2027, pro su Rassemblement National, su partidu de sa destra transalpina, erede de su Front Nationale de su babbu, Jean Marie Le Pen.
Sa magistradura at istabilidu, su 31 de martzu, ca est inelegìbile pro chimbe annos pro una cundenna de primu gradu a bator annos de presone, chi duos sunt a sos arrestos domitziliares. S’acusa, in curtzu, est de àere leadu dinari de s’Unione Europea pro sos assistentes parlamentares e dd’àere imbetzes usadu pro pagare atividades de partidu, intre su 2004 e su 2016.
Su tantu de dinari est de belle tres milliones de èuros.
Sa lege frantzesa istabilit ca in custu casu su polìticu non podet prus partetzipare a eletziones. Pro Le Pen duncas at a èssere impossìbile finas a si candidare comente parlamentare. Àteros sete esponentes de su Rassemblement National ant tentu sa matessi cundenna.
A fàghere nàschere carchi duda pro sa detzisione de sos giùighes est però su fatu chi sa cundenna est, comente naradu in antis, de primu gradu. No ant galu tzelebradu su protzessu de apellu in ue s’imputada diat pòdere èssere finas assòlvida dae sas acusas.
Pro custu motivu finas su lider de su partidu de manca La France insoumise, Jean-Luc Mélenchon, at mantènnidu una positzione bastante neutrale, decrarende in unu comunicadu ufitziale ca sos fatos sunt in «contradditzione cun s’islogan conca arta, manos netas chi custu partidu at chircadu tempus meda de prosperare. Registramus custa detzisione de su tribunale, finas si no atzetamus pro printzìpiu chi unu ricursu non potzat èssere possìbile pro cale si siat parte in càusa».
Marine Le Len fiat favorida in sas inchiestas de opinione. A custu puntu su candidadu de su RN at a èssere Jordan Bardella. Nàschidu in su 1995, de ratza italiana e cun unu bisaju de ratza algerina, est presidente de su partidu e europarlamentare.
(gianni muroni)
Leave a comment