S’8 e su 9 de làmpadas in Sardigna b’amus ses eletziones comunales e, comente in totu s’istadu italianu, chimbe cuesitos referendàrios. Sas amministrativas interessant su cabu de logu provintziale de Nùgoro e sas biddas de Onieri, Muristeni, Cardedu, Goni e Solèminis.
In Nùgoro su disafiu printzipale (su chi diat pòdere lòmpere a unu ballotàgiu) est intre su campu largu de tzentru manca e su tzentru dereta cun su de tres polos a s’àtera. Sa prima coalitzione at candidadu a Emiliano Fenu, parlamentare de su Movimentu 5 Isteddos; s’àtera at seberadu a Giuseppe Luigi Cucca, giai segretàriu regionale de su Pd dae su 2017, coladu a Italia Viva su 2019 e a is de Calenda su 2023. De Cucca si podet fintzas nàrrere chi Christian Solinas lu cheriat segretàriu generale de sa RaS e chi sa sorre Gemma fiat in su collègiu chi decrareit decàida Alessandra Todde.
Sos 5 cuesitos abrogativos sunt promòvidos dae sa Cgil e dae movimentos tzìvicos chi cherent mudare unas cantas normas in contu de traballu (sos primos bator) e de tzitadinàntzia (su de chimbe). Cun su primu si pedit de torrare a pònnere sa tutela in casu de litzentziamentu illegìtimu comente fiat in antis de su jobs act rentzianu. Cun su segundu si cheret imbetzes abrogare su lìmite màssimu de s’indennizu econòmicu pro su is traballadores litzentziados. Su de tres pertocat sos cuntratos a tèrmine e su de bator, in fines, est pro abrogare unas cantas normas chi, a bisu de is promotores, lìmitant sas responsabilidades de sas aziendas in contu de infortùnios.
A banda est su de chimbe, chi riguardat sa tzitadinàntzia pro is istràngios chi non sunt parte de s’Unione europea e chi punnat a nche barigare su rechisitu atuale de sos deghe annos de residèntzia legale pro l’otènnere. Abroghende sa norma si cheret reduire custu tempus a chimbe annos.
mauro piredda
https://www.pexels.com/it-it/foto/persona-caduta-di-carta-sulla-scatola-1550337/