Domìniga 2 de trìulas sa cumpangia de dantza DanSoul Studio de Tàtari at presentadu in su teatru Verdi de sa capitale turritana s’ispetàculu La Bayadère.
S’òpera est istada ideada dae Marius Petipa pro sas coreografias, cun mùsica cumposta dae Ludwig Minkus e cun librete de Sergej Chudekov. Sa prima rapresentatzione est de su 1877 in su teatru Bol’šoi Kamennyj de San Pietroburgu.
Est sa posta in iscena de un’Ìndia mìtica, sena de tempus, in unu perìodu chi su romantitzismu europeu fiat belle ammajadu dae su fenòmenu de s’esotismu. Sos protagonistas de custa istòria, chi s’isvilupat a inghìriu de un’amore tràgicu, sunt Nikija, sa dantzadora de su tèmpiu, su gherreri Solor, chi s’innamorat de issa, e Gamzatti, sa fìgia de su braminu, chi est issu puru innamoradu de sa bella Nikija.
Sa versione chi su pùblicu sardu at assìstidu est sa de Rudolf Nureyev. Sa diretora artìstica de sa DanSoul Sharon Podešva at chertu in custu modu omagiare a su ballerinu russu, figura oramai mìtica de sa dantza, in sos trinta annos dae sa morte.
Nureyev difatis aiat traballadu a un’interpretatzione sua de custa òpera sos ùrtimos tempos de sa vida sua e dd’aiat rapresentada in su 1992 in s’Opéra de Parigi.
S’ispetàculu, de sa durada de unas tres oras, fiat partzidu in bator atos, cun càmbios de iscenas e costumes. Intre sos intèrpretes si podent ammentare a Martina Fancellu, chi at dadu corpus e cara a su personàgiu de Nikija, a Lucrezia Lecis, chi at interpretadu su ruolu de Gamzatti, e a Danilo Calabrese, chi est istadu in su palcu su gherreri Solor.
Sharon Podešva, cun sa DanSoul, est sighende sa traditzione de famìllia. Difatis sa mama de su babbu fiat Jaguse Vrankova, chi est istada prima ballerina in su teatru de Praga e chi aiat abertu s’iscola de dantza clàssica, sa prima in Sardigna, Città di Sassari.
(gianni muroni)
Leave a comment