Su 23 de abrile, in sa Biblioteca Comunale s’amministratzione Comunale paris cun sa Biblioteca Comunale e cun s’Ufìtziu de sa limba sarda ant presentadu su libru “Jorge s’amigu nostru”.
Custu libru, chi contat de sa bida de Jorge Bergòglio in antis de devenneret Papa Frantziscu est iscritu in italianu dae J. Perego cun sas pinturas de G. Manna, e l’at bortadu in sardu Diegu Corràine.
Su 23 de abrile est sa die mundiale de su libru e de sos deretos de autore, e in prus si festat finas a Santu Giorgi: una die chi pariat fata a posta pro presentare custu libru.
At comintzadu su Sìndigu de Lodè Gratzianu Spanu chi at ammentadu comente s’amministratzione comunale de Lodè at semper contivigiadu s’amparu de sa limba sarda e de s’identidade.
At sighidu su retore Giuanne Melis, chi at fatu cumprèndere comente giai dae cussos contos de sa bida de Jorge cando fiat galu a devenneret Frantziscu si bidiat cantu s’umanidade sua fiat manna. A su Retore l’at ispantadu meda su contu de cando Bergoglio cunfessaiat in sa metropolitana, e de cando cumpriat su ministèriu suo peri sos caminos de Baires.
Ànghelu Canu at faeddadu de su libru comente unu boom editoriale chi at bèndidu còpias meda, e at ammentadu s’importu de sa Die mundiale de su deretu de autore, comente die de importu mannu. E at lèghidu s’introduida de su libru.
At concruidu sos arresonos Diegu Corràine contende comente est nàschidu su libru, e ammentende cantu a tènnere sa bortadura finas in sardu siat unu bàntidu mannu pro sa limba: at finas chistionadu de s’importu de sa limba sarda pro sa fide e cantu si diat pòdere fàghere in sa crèsia pro sa polìtica linguìstica.
A pustis de sos arresonos at cantadu su coro de Lodè ghiadu dae su maistru Michael Dettori cun tres cantzones pro Nostra Segnora. Unu momentu galanu chi at concruidu unu sero de limba, de fide e de cultura.