Eris Mario Darghi est andadu dae Mattarella e si nch’est dimìtidu dae Presidente de su cussìgiu. Sa resone est chi sa majoria de guvernu si nd’est segada ca no ant agatadu un’acordu cun Giuseppe Conte a subra de su sustegnu a s’Ucràina e a subra de sa manera de sighire sos bonus pro s’edilìtzia. Mattarella at refudadu s’ischerta e at mandadu Draghi a su Parlamentu pro cumprèndere si b’at una majoria chi lu cheret sustènnere fintzas a su 2023.
S’ischiat dae meda: Conte non podiat bajulare nen sa ruta sua pro neghe de Renzi, e nen sa bènnida de su guvernu Draghi chi at ammanigiadu su dinari chi aiat agatadu isse in Europa. Si fiat giai bidu cando si depiat seberare su Presidente de sa Repùblica: gente meda ispinghiat pro pònnere Draghi, francu su Movimento Cinque Stelle, mescamente pro sa voluntade de Conte, chi non lu cheriat in mesu pro sete annos.
Ponende a banda custa tìrria, Conte at su bisòngiu de traballare a sa campagna eletorale pro pesare su movimentu dae una crisi longa chi paret non si potzat sanare, e a su matessi tempus, cheret torrare a su surcu suo sos chimbe isteddos chi parent in abbolotu a pustis de sa cuntierra cun Di Maio. Duncas custa mòvida est s’inghitzu de sa campagna eletorale, una netzessidade pro una fortza polìtica chi at pagadu meda annos e annos de guvernu.
(redatzione)
Leave a comment