B’at una paràula noa chi est torrende a definire sa làcana intre sa vida colada peri sos social network e su bòidu chi si lassat cando sa vida reale finit. Custa paràula est webetery e cumprendimus deretu chi movet dae web e dae cemetery. E nos lu sunt presentende – fintzas gràtzias a sas novas de custas iscutas – non comente unu logu iscurigosu de sa rete ma comente un’orizonte digitale in ue su cuntzetu de pasu est pàsidu a beru.
S’idea naschet in Sardigna cun sa startup Zephorum, e in Sardigna nde semus faeddende ca in custu orizonte b’est como su mausoleu digitale de Michela Mùrgia. Ma comintzemus pròpriu dae s’idea. «Totu su chi pùblicas in sas retes sotziales, sas foto chi tenes in su telèfonu tuo e sas e-mail – leghimus in webetery.zephorum.com –, sunt s’eredidade digitale tua. Ite nd’at a èssere de totu custu cando non bas a àere prus? E comente podes amparare custu patrimòniu ispetziale chi tenet unu grandu valore pro tene e pro sos caros tuos caros?».
Sa risposta nos la dant s’amministradora de sa startup Giulia Salis Nioi, su diretore operativu David Harris, su responsaàbile de sa protetzione de sos datos Giovanni Battista Gallus e sa responsàbile de progetu Matilda Harris cun bator paràulas crae: ètica, innovatzione, empatia e rispetu. In pràtica, cun custu campusantu digitale s’identidade virtuale no est lassada a su degradu de sos algoritmos, ma custoida cun dignidade.
Comente traballat Zephorum? Pròpiu comente unu custode chi, pro mèdiu de istrumentos legaltech, permitit de recuperare sos contenutos dae sos gigantes de su tech (comente Meta o Google). Unu servìtziu est su de s’urna: «Sa punna – leghimus – est s’eliminatzione de sos profilos dae internet e s’ammentu privadu de sos contenutos e de sas informatziones de valore». S’àteru est su de su mausoleu giai mentovadu: in prus de eliminare sos profilos dae su web, sa punna est sa de sa «commemoratzione pùbblica in intro de un’ispàtziu protetu e seguru». Ma b’est fintzas su servìtziu “oblivion” chi «recùperat sos contos hackerados, èliminat sos contenutos no agradèssidos, verìficat furas de identidade» e àteru. Sa nova de custas dies, comente fìamus narende a comintzu, est sa publicatzione de su mausoleu digitale de Kelledda. Est gasi che s’eredidade intelletuale de s’iscritora nche l’ant tramudada dae sas retes sotziales a un’archìviu indipendente.
Gianfranca Orunesu
(Foto de The Six)
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22