– de Salvatore Serra –
Su metaversu est un’universu post-realidade, un’ambiente multiusuàriu eternu e persistente chi ponet in pare sa realidade fìsica e sa virtualidade digitale. Si fundat in s’addòviu de tecnologias, comente sa realidade virtuale (RV) e sa realidade aumentada (RA), chi permitint interatziones multisensoriales cun ambientes virtuales, ogetos digitales e pessones. Duncas, su metaversu est una retza interconessa de ambientes immersivos e sotziales in prataformas multiusuàriu persistentes.
Est un’ambiente in ue sos umanos interagint e cuncàmbiant esperièntzias virtuales impitende sos avatar, pro mèdiu de unu suportu lògicu in un’ ispàtziu tzibernèticu chi òperat comente una metàfora de su mundu reale, ma sena nde tènnere a mala bògia sas limitatziones.
A su sòlitu est formadu dae ispàtzios virtuales tridimensionales mùltiplos, cumpartzidos e persistentes, ligados a un’universu virtuale pertzepidu.
In unu sentidu prus ampru, su metaversu si podet refèrrere no a sos mundos virtuales ebbia, ma finas a sas esperièntzias multidimensionales de impreu e aplicatzione de internet in su cumplessu suo, mescamente s’ispetru chi cumbinat sa web 2.0, sa realidade aumentada, sa tecnología 3D e sa realidade virtuale.
Finas a como ant assebertadu impreos aplicados de metaversu in sos terrinos de su divagu, de sa tele-educatzione, de sa tele-salude e mescamente in su campu de s’economia digitale, in ue cumintzant a essire a campu formas noas de balore comente sos token non fungìbiles (NFT, in sa sigla in inglesu).
Mancari finas a como s’esperièntzia prus de profetu de metaversu siat istada “Second Life”, si pensat chi at a èssere sa sotziedade “Meta” (chi in antis fiat connota comente “Facebook, Inc.”), de su magnate americanu Mark Zuckerberg, a ghiare sos isvilupos noos in sos annos benientes, ca est sa sotziedade globale chi est impitende prus siendas umanas e tecnològicas, finas cun sa tecnología de software e hardware.
Leave a comment