In Isvìtzera como at a èssere obligatòriu pro sos politzia fàghere a ischire edade, sessu e natzionalidade de reos, inditziados e vìtimas de crìmines, francu cuddos casos particulares chi pòngiant in perìgulu o permitant de identificare calicunu de sos protagonistas de custos fatos.
S’initziativa parlamentare est istada aprovada martis 3 de martzu dae su Cussìgiu de sos Istados, sa Càmera Arta de s’Assemblea Federale, est a nàrrere su parlamentu elvèticu, a pustis de àere tentu, cun 100 votos in favore, 84 contra e 5 astensiones, giai su via lìbera dae su Cussìgiu Natzionale, sa Càmera Bassa.
Sa proposta fiat de Benjamin Fisher, rapresentante de s’UDC (Unione Democratica di Centro), partidu de tzentrudestra, su prus rapresentadu in su Cussìgiu Natzionale.
Custu passu, segundu sos esponentes de su partidu, est motivadu dae resones de trasparèntzia. Sos tzitadinos tenent deretos a tènnere tzertos datos finas pro non pèrdere fide in sas istitutziones.
Sa detzisione de su Cussìgiu de sos Istados, chi nde faghent parte sos rapresentantes de totu sos cantones, est arribada mancari su sugerimentu de sa Cummissione Preparatòria fiat negativu.
Su parlamentare Daniel Jositsch, de su Partidu Sotzialista, de indiritzu sotzialdemocràticu, e esponente de sa cummissione, aiat espressadu su pàrrere negativu narende chi non si podet custrìnghere sa politzia a publicare tzertos datos. In prus, giai sa metade de sos cantones ddu faghet sena chi siat obligatòriu. Tocaiat duncas a lassare, custu fiat su sensu de sa positzione de sa Cummissione, autonomia a sos diferentes cantones.
Sa Cunfederatzione Elvètica, chi in realidade est unu sistema federale, tenet un’esecutivu, mutidu Cussìgiu Federale, formadu dae esponentes de sos prus partidos mannos, segundu sa fòrmula chi ddi narant democratzia de cuncordàntzia.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment