Est cumintzadu – in sa sede de s’Istituto Europeo Ricerca e Formazione Professionale onlus de Casteddu – su progetu “Eesi-Digi”, cun s’obietivu de frunire solutziones tecnològicas pro nche barigare sas barrieras chi impedint s’imparu a sos istudiantes disàbiles.
Un’initziativa, sa de Eesi-Digi, nàschida dae sa sinergia intre Ierfop onlus e delegatziones dae Ispagna, Grecia, Lituania e Ungheria chi rapresentant universidades e assòtzios. Sa punna est sa de megiorare sa preparatzione de sas persones disàbiles e s’intrada issoro in su mundu de su traballu, brinchende·nche sas barrieras chi bi lis impedint, pro mèdiu de unu cursu in una prataforma telemàtica.
Sos dischentes ant a èssere acumpangiados durante sa formatzione e ant a èssere invitados a iscumproare sos istrumentos produidos e creare contenutos digitales interativos in forma de vìdeo (chi los ant a difùndere in sos social media).
Sunt medas sos fatores crìticos chi impedint a sos istudiantes cun esigèntzias ispetziales: mancàntzia de mèdios de mobilidade e mètodos pedagògicos ad hoc, paris cun s’assèntzia de infrastruturas dèghidas, s’aunint a sas dudas in su mundu de su traballu e a casos de discriminatzione.
«Pro custu est pretzisu a megiorare sos mètodos pedagògicos in contu de cumpetèntzias digitales, mescamente in tèrmines de cualificatzione e formatzione, pro chi si permitat a sos dischentes disàbiles de cumpensare fartas eventuales e otènnere prus cumpetèntzias chi los agiudent a cumpètere mègius in su mundu de su traballu», narat su presidente Ierfop Roberto Pili.
Su progetu biennale at a dare vida a unu report natzionale e internatzionale esplicativu de sas fartas agatadas. Chimbe sos incontros cun partner de Madrid, Patrasso, Vilnius e Budapest. Sos resurtados ant a èssere difusos pro mèdiu de sitos web, newsletter, e-mailing, social media, imprenta e publicatziones iscientìficas.
«Su progetu – serrat su diretore de sas atividades didàticas e formativas, Bachisio Zolo – punnat a creare unu ambiente educativu inclusivu chi favoressat ecuidade e agualidade e respondat a sas esigèntzias tecnològicas sas prus noas, trasformende sos dispositivos digitales dae barrieras a istrumentos de suportu pro su concruu de sos istùdios e s’achirimentu de cumpetèntzias pro sos dischentes disàbiles».
Gianfranca Orunesu
(foto Ansa)