Sèberos de Sarvadore Serra
leados dae s’òpera Sos vantos de su machine (Stultitiae laus)
de Eràsimu de Ròterdam traduida in sardu dae Albino Pau
e publicada dae Condaghes in su 2009.
Difatis, in sos inditos de sos Istòicos, sa saviesa àteru no est si non su ponner mente a sa rejone e, a s’imbesse, su machine est su de si ponner a tzerachia de sos disitzos irmoditos. E sinnuncas, pro ovitare chi sa vita de s’òmine esseret istata petzi peleas e anneos, intro de issa Zove b’aiat missu sos disitzos irmoditos in cantitate meta prus manna de sa saviesa. E cantu? Dia poter narrer de su matessi tantu chi b’at tra una mesu e dòichi untzas.
A pustis a su tinu nche l’aiat acorralatu in un’oreddu de sa conca, gai lassanne su restu de sa carena in potestate de sos disitzos irmoditos. Pro mal’annanta at postu cara a su tinu, ch’est a sa sola, duos sentitos a ghisa de arrebatos arrogantes, s’airu chi in sa roca de su petus est de vàrdia a su coro matessi, bena de sa vita, e s’asurìmene chi allàrghiat e illonghiat a onz’ala s’impèriu suo fintzas a josso de sa bentre.
Leave a comment