Sèberos de Sarvadore Serra
leados dae s’òpera Sos vantos de su machine (Stultitiae laus)
de Eràsimu de Ròterdam traduida in sardu dae Albino Pau
e publicada dae Condaghes in su 2009.
A sa secura issa non diat poter esser arramponata dae perunu cristianu, si galu un’àtera via jeo non dia aer pietu de tanta misèria e non mi li dia ponner a costatzu.
E gai, a sa moda chi in sos poetas sas deitates sunt avesas a suncurrer a sos chi sunt a punta a morrer, gai matessi jeo, canno sunt a prope de sa tumba, nche chìrrio sos vetzos, pro cantu poto, dae novu a pitzinnia. Est pro custu chi sa tzente s’est avesata a narrer chi sos vetzos torrant a pitzinnos. E si carcunu cheret ischire sa manera de su tramutamentu, tambene in custu lu chèglio cuntentare.
Jeo nche los leo a sa funtana de sa ninfa mea Lete, chi naschit in sas ìsulas Ditzosas (cussa chi curret in s’Iferru est petzi unu traineddu); inoche issos bient a sa funtana de s’irmènticu mannu, sas penas de s’ànima s’irfachent e a bellu a bellu torrant criaturas.
Leave a comment