Oe est in tretos de Casteddu su Ministru de sa Cultura Franceschini, cras at a suprire a Tàtari su Presidente de sa Repùblica Mattarella. Pro ambos duos sa resone de sa bènnida pertocat anniversàrios de sa cultura sarda ligada a s’Itàlia: su de unu est bènnidu pro festare s’Istitutu Martini de Pauli Ceraxius; su de duos pro sos chent’annos dae sa nàschida de Berlinguer.
Franceschini est una figura de importu pro su protzessu de valorizatzione de sos Gigantes de Mont’e prama e at amparadu su traballu fatu a subra de sa fundatzione a issos ligada. In prus at torra naradu chi sa cultura sarda est manna e chi si podet isfrutare meda de prus pro su turismu, ca est un’ispantu ùnicu. Mattarella at a bènnere pro alabare unu polìticu italianu mannu nàschidu in Tàtari. S’ammentu de unu personàgiu gasi de primore, chèrridu bene dae medas, e divènnidu sìmbolu de una polìtica fata comente si tocat, cun ideales e onestade, at a aunire sardos medas fatu a su Presidente de sa Repùblica. Mattarella chi at a decrarare messàgios de sacrifìtziu e de impinnu pro su bene comune e pro s’Istadu. Tres persones de gabbale e chi agradant a s’opinione pùblica de s’ìsula.
Sa cumbinatzione de sos tempos però pesat unu sentidu de “operatzione simpatia”. Custas bìsitas, difatis, benint paris cun sas fritzas tresculores in s’Alighera e mescamente cun sas esertzitatziones militares, sas prus mannas dae tempus medas. Giogos de gherra chi ant fatu faeddare meda s’imprenta in custas chidas, e non petzi giornales isulanos ma de terramanna, e chi ant allutu cuntierras e manifestatziones.
(redatzione)
Leave a comment