Su candidadu a sa presidèntzia de sos Istados Unidos pro su partidu republicanu, Donald Trump, est istadu vìtima de un’atentadu su 13 de trìulas coladu.
S’ex presidente fiat faeddende in unu comìtziu eletorale in Butler, in s’istadu de sa Pennsylvania, cando un’òmine, Thomas Matthew Crooks, dd’at isparadu.
Crooks fiat pigadu a subra de una cobertura a unos 130 metros dae sa postatzione de Trump, armadu de fusile.
Unu de sos isparos at mortu a un’òmine, Corey Comperatore, chi fiat ascurtende su comìtziu. Sa balla isparada contra a Trump, s’obietivu de s’atzione criminale, dd’at fertu a s’origra. Unu movimentu de sa conca fatu de repente at sarvadu sa vida a s’òmine polìticu.
In antis chi esseret isparadu, paritzas persones presentes in s’eventu aiant annotadu a subra de sa cobertura e signaladu a Crooks a sos òmines de sa politzia e de su servìtziu segretu, chi est intervènnidu cun sos tiradores petzi a pustis chi s’òmine at fatu partire sas primas fusiladas, ochiende·ddu.
De Crooks s’ischit chi teniat 20 annos, fiat un’istudiante, fiat imparende programmatzione informàtica e aiat partetzipadu, de badas, a unu filmadu promotzionale de su fundu de investimentu Black Rock.
Trump, chi no at tentu dannos mannos, est sighende sa campagna eletorale. S’est presentadu a sa RNC (Republican National Convention) in Milwaukee, in su Wisconsin, cun s’origra fascada e at annuntziadu su nùmene de su chi at a èssere su vitzepresidente, in casu de vitòria a sas eletziones presidentziale de santandria.
Su seberadu est James David Vance. Tenet baranta annos e est senadore pro s’Ohio, s’istadu in ue est nàschidu e crèschidu. A giòvanu est istadu in sos marines e a mannu s’est cunvèrtidu a su catolitzèsimu.
At bogadu fama in su 2016 cun unu libru cun cuntenutu autobiogràficu intituladu Hillbilly elegy: a memoir of a family and culture in crisis.
(gianni muroni)
Leave a comment