In su mentres chi sa politzia est chirchende in mesa Itàlia sos furadores chi ant fatu s’isrobatoriu de chenàbura colada in chìrrios de Livorno, in sas retzas sotziales est iscopiada una cuntierra a subra de sas paràulas de Saviano in contu de sa genia de criminalidade chi b’at in Sardigna.
Tzucamus dae sas acontèssidas. Prus o mancu a sas ses de sero de su 28 de martzu a San Vincenzo, a curtzu a Livorno, ses o sete furadores ant firmadu duos porta-valores e los ant isrobados. Su tretu de istrada giughiat un’istrinta e est istadu fàtzile pro sos criminales a los fàghere arressare. Unu de sos furgones teniat su dinari, s’àteru fiat pro seguresa, ma sas bàrdias no ant proadu a defensare su bàrriu, ca sas armas de sos chi ant atacadu fiant prus fortes e sa minetza fiat de los brusiare a intro de sas veturas; dae s’àtera ala sos furadores ant abertu petzi cussu cun sos soddos. Su dinari mustrencu a cantu paret bàrigat sos bator milliones. Fintzas custa borta non b’at mortos e nemmancu fertos e custa est un’àtera proa de s’abilidade e su contivìgiu tentu pro fàghere s’isrobatòriu.
S’acontèssida at assuconadu s’opinione pùblica terramannesa, chi fintzas a cando custos abbolotos capitaiant inoghe, non si fiat mancu abbista de su trìulu chi si fiat pesende. Dae sos vìdeos chi sunt essidos a campu, si cumprendet chi prus de unu de sos furadores est sardu. E non b’at problema, sos criminales istant in totue a dolu mannu, su chi at incumintzadu a infadare calicunu on-line, a resone, est sa torrada de sos pregiudìtzios a subra de sa “natura banditesca” de sa ratza nostra.
In sa dibata s’est annantu Saviano chi, in unu vìdeu longu 25 minùtiles pro Fanpage, analizat su chi est capitadu. In s’arresonu suo non mancant faddinas. Pro fàghere duos esempros: no est sa fura de custa genia prus manna chi est capitada, comente no est beru chi onni borta s’istrada seberada at un’istrinta pro traballos. Ma sa cuntierra chi s’est pesada a subra de su parre suo est pro unu tìtulu de giornale chi, aposta o nono, sutalìnea una fràsia chi paret nàrrere chi totu cantos sos sardos sunt criminales, ma non mafiosos. Dae in ie sa cuntierra: atacos e defensa de Saviano ca est bivende cun s’iscorta, ma a coddos de sa comunidade; crìticas e amparu a sos sardos dae su pregiudìtziu, ma chi però bi fiant a fàghere cussu burdellu e gasi sighende in sa dinàmica tòssica sòlita de sos social network. Chimentu bòidu, pro su prus, e sena sutzu.
Cando unu ascurtat s’arresonu si cumprendet chi Saviano non cheret nàrrere custu, ca su cuntestu est craru e non b’intrat ratzismu perunu. Antzis su vìdeu est interessante ca proat a pònnere custa genia de furòngios a intro de unu sistema criminale prus mannu. Si tenet resone o nono, l’amus a iscobèrrere cando ant a fàghere su protzessu, ma paret chi depimus tènnere passèntzia galu pro carchi tempus.
Gabriele Tanda
Leave a comment