Su Coordinamentu de sos comitados territoriales sardos contra a s’ispeculatzione energètica at imbiadu a su Consìgiu regionale, a su presidente de sa Giunta e a sos assessores regionales una proposta de lege de moratòria cun atu de indiritzu polìticu in contu de impiantos de produtzione dae fontes rinnovàbiles de grandu mannària. «Sa proposta – narant – movet dae su cunfrontu chi sos Comitados ant àpidu custos meses cun comunidades e amministratziones e punnat a sa transitzione energètica comente una possibilidade noa de isvilupu e de progressu pro sa Sardigna cun sas comunidades e sos tzitadinos protagonistas de su benidore issoro». In premissa a su testu su Coordinamentu ammentat sas rechestas de connessione a sa rete elètrica sarda presentadas a Terna pro 718 impiantos noos e pro una potèntzia cumplessiva de 56,08 GW gasi partzida: 21,01 GW fotovoltàicu; 15,07 GW eòlicu a terra; 20,00 GW eòlicu a largu. Valore 7 bortas e mesu prus mannu de sos 7,45 GW prevìdidos dae sa partzimenta a base regionale de s’obietivu Ue FF55 e 9 bortas prus mannu de sos 6 GW prevìdidos dae su decretu de su ministru Pichetto Fratin in contu de tretos dèghidos o mancu. «Cunsiderende chi sa potèntzia istantànea pedida in mèdia dae sas utèntzias sardas est inferiore a sos 1000 MW (cun puntas de 1400 in casos pru chi no etzetzionales, craru est chi, aprovende e faghende totu sos 718 impiantos, s’energia produida at a sobrare de 50.000 MW e barda. Energia in etzessu e chi s’at a isprecare ca no at a pòdere èssere impreada in Sardigna e nemmancu giuta a àteras regiones ne acumulada». In sa proposta de lege si faeddat finamentas de amparu de su patrimòniu agrìculu, de alteratzione de su mercadu de sos terrinos, de impatu ambientale e paesagìsticu e de sas dipendèntzias de custa terra in su passàgiu dae su fòssile a sas produtziones noas. In prus de sa moratòria, sa proposta impignat sa Giunta a aprovare su pianu energèticu regionale suo intro de su 30 de santandria de ocannu.
Leave a comment