Sa primu cosa chi b’at de nàrrere est chi in s’istadu ispagnolu faghent a lestru. A ora de mesunote nche sunt lòmpidos a su 100% de setziones iscrutinadas. Sa home page de giornales comente El Mundo, El Pais, Público e àteros fiat a su muda-muda de continu cun pertzentuales noas cada pagos minutos. Sa segunda cosa pertocat su resurtu, chi est custu: su Partido Popular de Alberto Núñez Feijó est primu partidu, ma in pare cun sos de Vox, non resessent a otènnere sa majoria assoluta, chi est de 176 de 350 iscrannos totales in su Cungressu. Sa de tres riguardat pròpiu sa mèngua de s’estrema dereta de belle 20 iscrannos. Sa de bator la bidimus pintada in sa cartina, cun Euskadi (Euzko Alderdi Jeltzalea-Pnv in Bizkaia, Euskal Herria Bildu in Gipuzkoa e Euskadiko Ezkerra-Psoe in Araba), Nafarroa* (Nafarroako Alderdi Sozialista-Psoe) e Catalunya (Partit dels Socialistes de Catalunya-Psoe) chi no l’ant dadu cunfiantza a sa dereta. Sa de chimbe nos contat sa resistèntzia de su Partido socialista obrero de España de Pedro Sánchez, cun petzi unu puntu pertzentuale in mancu de su Pp (31,83%); Psoe chi binchet fintzas in sa comunidade de Extremadura e in sa provìntzia de Sevilla (in Andalucía). Sa de ses pertocat sos indipendentistas: creschet Bildu ebbia (+ 1 iscrannu) cando chi su Bloque Nacionalista Galego abarrat a 1; perdent iscrannos su giai mentovadu Pnv (-1), Esquerra Republicana de Catalunya (-6) e Junts per Catalunya (-1). De cada manera sos 7 iscrannos de sos de Carles Puigdemont diant pòdere permìtere unu guvernu a ghia sotzialista (122) in pare cun sos 31 de Sumar (manca radicale cun in intro Izquierda unida e Podemos) e sos àteros de Erc, EH Bildu, Pnv e Bng. Ma sos de Junts narant chi «non nche lu setzimus a Sánchez in càmbiu de nudda». Duncas: o unu guvernu progressista o torra eletziones.
màuru piredda
*Euskadi, Nafarroa sunt sos tretos ispagnolos de su Paisu Bascu, de Euskal Herria. Iparralde nch’est in intro de s’istadu frantzesu. Duncas unu contu est a faeddare de Paisu bascu comente pàtria de sos bascos, aterunu est a faeddare de Paisos bascos chi sunt petzi sas tres provìntzias de Euskadi (Bizkaia, Gipuzkoa e Araba).
Leave a comment