S‘ex presidente catalanu Carles Puigdemont at naradu chi Pedro Sánchez at a pòdere retzire sos votos de Junts per Catalunya pro sa formatzione de unu guvernu petzi si ant a lòmpere a un’acordu pro sa chistione catalana e non pro sa situatzione sua personale. At agiuntu finamentas chi in sa tratativa non bi devent àere nen «pressiones», nen «ricatos polìticos». «Su candidadu sotzialista – narat – podet èssere elègidu a nou petzi si otenet su votu favorèvole dae parte de una grandu majoria cun in intro sos sete de JxC». A bisu suo non nch’at coladu tempus meda dae sas votatziones de domìniga colada «pro ischire ite ant a fàghere sos prus mannos partidos ispagnolos, su chi at pèrdidu binchende (su Partido popular, ndr) e su chi at bìnchidu perdende (su Partido socialista obrero de España)». Sos de su Pp, peristantu, ammentant s’astensione de su Psoe su 2016 pro permìtere sa nàschida de su guvernu Rajoy: su vitzesegretàriu de sa Coordinación Autonómica y Local de sos populares, Pedro Rollán, non nche la ponet a banda s’idea de negotziare cun Junts «in intro de sa costitutzione». Su Pp tando aiat 137 sègios, sos matessi de como. Sa majoria est de 176, 6 in prus de sos 170 incruende sos de Vox. A beru diat pòdere acontèssere un’allega intre Junts e custos pro sos 177 chi diant permìtere unu guvernu ghiadu dae Alberto Núñez Feijóo? Ite narant sos de Pedro Sánchez? Sa boghe de su Psoe in su Cungressu, Patxi López, at naradu chi Junts devet seberare: «o unu guvernu progressista o un’involutzione chi sos tzitadinos non cherent». S’indipendentismu catalanu non b’est lòmpidu a su millione de votos, cando chi àteras bias nche lu coleit. Sos de su Psoe, si a sos cuntzetos de sos agetivos in su nùmene issoro (sotzialista e operaju), non diant dèvere tìmere de abèrrere un’allega republicana e plurinatzionale cun in intro sa chistione catalana (fintzas preferende àteru a s’indipendèntzia e fintzas aprofitende·si·nde de sa crisi de s’indipendentismu). Si no lu faghent est ca non sunt a tretu de propònnere àteru chi non siat sa monarchia e s’unidade fortzada. E si no lu faghent si nde gosant su de su Pp.
màuru piredda
Leave a comment