Iscòtzia: duos partidos pro s'indipendèntzia o s'unu contra a s'àteru?

Alex Salmond, s’ex ghia polìtica de su Scottish national party, est torra in campu. Ma custu giru cun su partidu nou suo, s’Alba Party. Alba in gaèlicu cheret nàrrere Iscòtzia. E duncas sa punna est sa matessi: dare impèllida a sa càusa de s’indipendèntzia. Sos chi leghimus in su situ albaparty.org non parent nemmancu faeddos de una partzimenta dae su Snp, ma de carchi cosa de prus. «Belle unu de duos votos in favore de s’indipendèntzia lu perdimus pro more de su sistema eletorale de membros agiuntivos adotadu in Iscòtzia». Sa punna est duncas sa de non nch’ispèrdere sos votos e, cun duos partidos, sa de otènnere una “supermajority” pro-referendum. Su segundu a pustis de su de su 2014, su chi Boris Johnson non cheret cuntzèdere. «Cun custa “supermajority” amus a negotziare cun Westminster comente parlamentu e non comente partidu», leghimus semper in su situ web de sa formatzione noa. E cando ant a votare? Alba proponet una ispètzia de desistèntzia dende inditu de votare Snp pro su candidadu locale; su votu pro Alba, imbetzes, in s’ischeda regionale. Ma cantu at a istorbare, custa mossa, a su partidu de Nicola Sturgeon? Est de custas oras su primu passàgiu importante a sa formatzione noa: su de su parlamentare in Londra Kenny MacAskill. Custos sos faeddos graes de sa prima ministra iscotzesa: «Sa mòvida sua est un’assulenada». E de Salmond ite at naradu? «Est unu giogadore de azardu». A bìdere istemus. (màuru piredda)