Unu terremotu giuditziàriu nou est interessend su sistema educativu de sa Catalugna. Su Tribunale superiore de giustìtzia de sa comunidade autònoma (TsjC apartendente a su Poder judicial de España) at ordinadu s’esecutzione provisòria de sa sentèntzia chi annullat sos puntos càrdine de su decretu legislativu chi punnat a amparare su catalanu comente limba veiculare ùnica in sas iscolas. Sa detzisione, lòmpida a pustis de sa rechesta de s’assòtziu “Asamblea por un’Escuela Bilingüe” (Aeb), si presentat comente unu partziabbas definitivu in s’iscontru intre sas istitutziones regionales e su podere giuditziàriu ispagnolu. Su decretu in chistione l’aiat varadu sa Generalitat su 2024 comente iscudu normativu pro inghiriare s’impositzione pretzedente de sa cuota de su 25% de oras de letzione in castillianu. Sos giùighes de su TsjC ant istabilidu chi custa blindatura est illegìtima. Duncas cun custu òrdine de esecutzione provisòria, su tribunale no isteta chi su Tribunale Supremu si pronùntziet in finitias: como sas iscolas ant a dèvere comintzare a modificare deretu sos progetos linguìsticos pròpios garantende a su castillianu un’istatus de limba co-veiculare efetiva e non marginale ebbia. Pro su tribunale, su catalanu non podet èssere s’ùnica limba de riferimentu in s’atividade dotzente, amministrativa o in sos materiales didàticos. Sa sentèntzia interessat finas s’acollièntzia de sos alunnos istràngios noos, chi no at a pòdere prus èssere acumprida petzi in catalanu. Su cussigeri de sa Polìtica linguìstica de sa Generalitat Francesc Xavier Vila at cunformadu s’impignu de su Govern (catalanu, ndr) in sa defensa de su modellu educativu atuale contra a sas chi definit “ingerèntzias giuditziàrias”. Peristantu sos servìtzios giurìdicos de sa Generalitat sunt istudiende una risposta. Sa batalla pro s’immersione linguìstica, duncas, si la sunt gioghende in su pianu de sa resistèntzia istitutzionale.
mauro piredda (foto Ali Ahmad DANESH)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment