– de Salvatore Serra –
Unos 20 annos a como totus si prenaiant sa buca de paràulas che pesaiant sonu come “globalizatzione”, “mercadu lìberu”, “privatizatziones”. Pariat chi s’autoridade pùblica non contaiant prus nudda e chi totu s’acontzaiat dende ampra manu a s‘initziativa de sos sìngulos. E si nde faeddaiat non pro s’atividade produtiva ebbia ma finas pro unu setore fundamentale pro sa formatzione de sos giòvanos comente s’iscola.
Su Currèu de s’UNESCO, revista chi essiat in sardu e in àteras 27 limbas, non podiat istransire s’argumentu e, in su mese de ghennàrgiu de su 2001, at dedicadu pàginas medas a su tema: “Iscola e mercadu, cumpatìbiles sunt?” Depimus nàrrere chi su prus de sos autores punnaiant a respòndere chi eja. Pro nàrrere, James Tooley nos faeddat de s’iscola privada comente de una sorte pro sos pòveros, Pedro A. Noguera nos informat chi “in sos Istados Unidos b’at babos e mamas chi cherent impreare sos impòsitos chi pagant pro fàghere istudiare sos fizos in iscolas privadas”, Luciana Zenti nos contat de “Objetivo”, un istitutu privadu ch “at fatu nascher in Brasile una rete de iscolas reservadas a sos pitzinnos de sas classes mèdias e artas”.
Como s’imbreaghera de su privadu est agabbada. Totus amus cumpresu cantu est de importu s’iscola pùblica. Abbarrat, però, in custu nùmeru de Su Currèu” (comente in sos àteros chi sunt essidos) su valore de una revista chi trataiat argumentos modernos in sardu, boghende·nche sa limba nostra dae su paule de s’antigòriu.
Inoghe, a ghisa de mustra, torro a iscrìere unas cantas rigas de s’artìculu de Jacques Hallak.
________
Sa globalizatzione est currende gasi in presse chi est intrende in àmbitos finas a como reservados a su setore pùblicu, comente s’iscola.
Sos ligàmenes intre s’iscola e s’atividade privada sunt antigos, chi si tratet de iscola privada, chi si tratet de iscolas chi òperant cunforme a modellos privados, o, galu, de missiones educativas de su servitziu pùblicu delegadas a operadores privados. Ma como b’at àteru. S’esplosione de sas tecnolozias noas, chi illestrint sa produtzione e sa difusione de “benes educativos”, sa mundializatzione de sos mercados, chi dat unu corfu de isprone a sa cumertzializatzione issoro in totu su mundu, e, in fines, su tentèu mannu chi lusingat sos impresàrios, semper in cherta de ocasiones noas de balanzu, un’atividade chi si balet unos 2000 mlliardos de dòllaros, aumentat in manera ispropositada s’oferta cummertziale cun “mercantzias educativas…
Leave a comment