A pustis de un’iscumbata, mutida “Monte nuovo”, chi andaiat a dae in antis dae tres annos e noe meses, sos carbineris de su ROS ant arrestadu trèighi persones e àteros degheoto sunt a sos domitziliares acusados de assòtziu pro delìncuere. Su tzentru paret èssere Tomaso Gerolamo Cocco, dutore anestesista e diretore de su repartu Terapia de su dolore de su Binaghi de Casteddu. Àtera persone de importu chi paret ligada a custu assòtziu est s’assessora betza a s’Agricoltura, Gabriella Murgia. Ambos duos como sunt in presone.
Su grupu – narant sos carabineris – poniat in paris professionistas de diferentes genias cun criminales comunes chi si cuncambiaiant pragheres: traballos, minetzas, votos, agiudos pro andare a dae in antis cun sa carriera. Cocco paret chi apat conchistadu su logu de diretore pròpriu pro more de custu talaranu de ligàmenes cumbinchende Massimo Temussi – chi fiat sa ghia de s’ATS in sos annos de su Covid – a li dare su logu chi disigiaiat.
S’intrada de Temussi – chi dae martzu est consigeri de sa Ministra de su Traballu, Calderone – in s’assòtziu est pagu crara: in su 2020 paret una vìtima de Gabriella Murgia, cun minetzas dae sos “amigos criminales” pro neghe de unu provedimentu disciplinare, ma a pustis paret chi Cocco lu cumbinchet a intrare. Comente e si de a beru, non s’ischit galu.
Custa s’ala professionale, s’àter’ala aiat pre-giudicados orgolesos, desulesos e de àteras biddas chi agiudaiant sos professionistas e oteniant in cuncàmbiu traballos e àteros pragheres, comente bìsitas mèigas. Sas duas partes s’atopaiant in ispuntinos in ue b’aiat gente maicanta (fintzas chi non b’intraiat) e podiant faeddare e ammanigiare sas mòvidas. Si non b’at neghe peruna a tratare cun persones chi sunt istadas in presone, àtera chistione est si cun custas si fraigat un’assòtziu criminale: s’iscumbata e su protzessu ant a sinnare sa làcana de chie bi fiat, e cantu, a intro.
Sos reselos pertocant fintzas su retore de s’Universidade de Tàtari, Gavino Mariotti, chi pariat unu de sos candidados dàbiles a remplassare Solinas in sas eletziones de su 2024, comente ghia de su tzentru dereta. Sa resone benit ca est mentovadu prus de una borta in sas relatas de sos carabineris, ma mai postu in mesu. Isse però in un’intervista in sa Nuova de oe denegat totu cantu: si connoschet calicunu de sos arrestados, sos raportos sunt lìmpios e pertocant su traballu. In cust’assòtziu non b’intrat nudda.
Sa polìtica sarda proat a fàghere carchicosa: s’opositzione cheret a nde arresonare in su Cussìgiu, sa maioria, a s’imbesse, non cheret abèrrere unu protzessu polìticu parallelu a su de sos tribunales. Però est craru chi s’iscumbata dat un’àteru corfu a Solinas chi bidet persones a costàgiu suo tocadas dae acusas pesosas.
Gabriele Tanda
Leave a comment