Sunt istados presentados duos progetos de duos campos eòlicos intro de su mare: unu est a largu de Pasada e Buduni e si mutit “Tibula Energia”, s’àteru s’at a fàghere a dae in antis de Nora. In sas ideas de sos ingennieris sas turres andant in unu tretu chi andat dae sos 40 a sos 25 chilòmetros a largu de sa costera: a parre issoro, una distàntzia gasi manna chi nd’at a costoire sa presèntzia. Is progetos como ant a èssere presentados a sa populatzione e carchi fortza polìtica est giai ammanigende s’opositzione.
Un’àtera noa chi est essida a campu dae pagu est chi SNAM at comporadu una nave pro batire gasu a Sardigna, mescamente in sa zona de Porto Vesme. Fintzas pro custa noa si fiant pesadas chèscias dae sos territòrios chi però nemos at ascurtadu: sos patos e sos progetos fiant giai colados e non b’aiat àteru de ite fàghere.
Pro sos progetos de s’eòlicu s’idea est de dare traballu a sa populatzione e fraigare cumpetèntzias de lassare in sos territòrios, ma custos sunt arresonos giai intesos. Sa timoria de sardos medas est chi a dae segus bi potzat èssere isfrutamentu sena crèschida. B’at de nàrrere chi in custas chistiones sa Regione, e mescamente Solinas, murrùngiat onni tantu, ma pro su prus istat a sa muda e lassat fàghere. Fintzas pro isfrutare sos soddos de su PNRR sa Regione pagu est faghende, perdende una possibilidade manna de a beru. Chie non si nd’est perdende de nudda est su guvernu, chi sas punnas suas de impreare s’ìsula comente giassu dae ue bogare energia las tenet bene in contu, finamentas impreende sa troga de s’apretu nàschidu dae sa gherra.
(redatzione)
Leave a comment