Su Mèdiu Oriente est acurtzu a s’allughere che a sa brùvera. Dae sas primas oras de sàbadu 28 de freàrgiu e pro totu sa die de eris, sos Istados Unidos e Israele ant corfidu su coro de sa Repùblica Islàmica, cun resurtados chi finas a pagas dies a oe non si podiant pensare. Su chi at ispantadu de prus est sa morte de s’Ayatollah Ali Khamenei, sa ghia prus arta de s’Iran, posca de unu “raid” de pretzisione in su “compound” sou in Teheran. A sas dudas de sas prima oras oras, chi ant sighidu su proclamu de su presidente americanu Donald Trump, est arribada sa cunfirma de sa TV de Istadu iraniana.
Paris a Khamenei, diant èssere mortos prus de baranta funtzionàrios de importu mannu e, intre custos, su cabu de Istadu majore de sas fortzas armadas e su cabu de s’intelligence de sa politzia, Gholamreza Rezaian. Ali Larijani, a cabu de su Cunsìgiu supremu de seguresa natzionale, at espressadu chi unu “protzessu de transitzione” at a comintzare luego. S’operatzione, fata cun prus de dughentos jet israelianos e s’agiudu de drones e mìssiles americanos (in mesu a custos, pro sa prima borta, sos drones noos LUCAS), at interessadu prus de chimbighentos obietivos.
Sas esplosiones ant fatu disacatu mannu in su distretu guvernativu de Pasteur Street (una carrela manna de Teheran in ue istant sas printzipales istitutziones de su guvernu) e paritzas bases de sos pasdaran. Unu de sos acadimentos prus feos de s’ofensiva est istadu su bombardamentu de un’iscola elementare pro fèminas in Minab, in su sud de su Paìsu, ue si contant a su nessi chentu e oto vìtimas, totus pitzinnas. Sas primas istimas chistionant de prus de dughentos mortos e chentinas de feridos in totu su territòriu iranianu.
S’Iran no est abarradu a pompiare e at imbiadu un’ofensiva chi sos “Guardianos de sa Rivolutzione” ant mutidu sa “prus pesante de s’istòria”. Teheran at lampadu mìssiles in sas bases USA e in giassos tziviles in Bahrein, Qatar, Kuwait e Emirados Àrabos Unidos. Àteras splosiones sunt istadas registradas a Dubai, Abu Dhabi e Doha.
Drones e mìssiles sunt rutos in s’aeroportu de Dubai e subra s’hotel Burj Al Arab, causende fogos e feridos. Mancari su lutu ufitziale, maigantas persones chi cherent sa fine de su regime teocràticu ant mustradu cuntentesa. In Trieste, giòvanos de sa diàspora iraniana sunt essidos a carrera pro festare, mentras in antis de sa Domo Biànca, si sunt bidos manifestantes contràrios a sa gherra e sustenidores de sa torrada de su Scià.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment