«Sa frontera ètica de s’intelligèntzia artifitziale si nch’est allarghende cun sas relatziones sentimentales intre sos èsseres umanos e sas IA. Pigare sas chistiones èticas de sas IA comente fastigiadores invadentes, cussigeris malignos e istrumentos de isfrutamentu rechedet chircas psicològicas noas in contu de su proite e de su comente sos òmines proant amore pro sas màchinas».
Custu est s’abstract, su resumu introdutivu de s’istùdiu conduidu dae unu grupu de psicòlogos de s’Universidade de Iscièntzias e tecnologias de su Missouri (Usa) ghiadu dae su dotzente Daniel Shank. Sa cosa no ispantat dae su versante hi-tech, sende chi b’at aziendas tecnològicas chi sunt investende meda in sa produtzione de cumpàngios personales, videogiogos romànticos, robot sessuales e chatbot sofisticadas.
Ma sa cosa no ispantat movende finamentas dae carchi acontèssida umana. Su 2024, a pustis de chimbe annos de “cunvivèntzia”, un’artista ispanu-olandesu s’at cojuadu su partner suo: un’intelligèntzia artifitziale ologràfica. Ses annos in antis su matessi, cun una coja de su gènere in Giapone. B’at unos cantos problemas chi a s’estremidade issoro si presentant finamentas cun casos de suitzìdiu cajonados dae custu casta de relatziones. Ma fintzas cun aspetativas trasferidas dae sas relatziones cun sas màchinas a sas relatziones umanas. Duncas sa chistione est dìliga e meresset interventos multidisciplinares. Sas chircas sunt petzi comintzende: cheret chi si cumprendant mègius custas dinàmicas e pro custu sos psicòlogos non devent istare in fatu a sa tecnologia ma a costàgiu de sos isvilupos suos pro chi sos agiudos e sos interventos potzant èssere lestros e profetosos. «Petzi cun custa rica cumprensione psicològica – serrat s’istùdiu – su pùblicu, sos progetistas de IA e sos legisladores ant a pòdere contribuire a fraigare unu benidore èticu in contu de intimidade artifitziale».
Gianfranca Orunesu
(Foto de Cottonbro Studio)
Leave a comment