Sunt semper de prus sos dispositivos chi tenent sistemas noos de intelligèntzia artifitziale, destinados a cada casta de funtzione pro los pòdere impitare mègius.
Sa IA brincat dae elaboradores e telefoneddos pro lòmpere a sos televisores, a sas cassas acùsticas, a sos relògios, a sos auriculares.
Bidimus comente.
TELEVISORES E CASSAS ACÙSTICAS
Sos televisores sunt sighende custa tendèntzia, e ditas che a Samsung e LG ant giai adotadu sos mègius modellos de intelligèntzia artifitziale. In prus de megiorare su reconnoschimentu de boghe e abilitare su controllu de sos gestos, ant fatu a manera chi totu sos cuntènnidos si dimensionent a sa resolutzione prus manna disponìbile — chi siat unu modellu 4K o 8K— a manera chi si bidat totu in manera prus crara.
In prus, sa IA agiuat su sistema a reconnòschere su chi semus bidende, a manera de personalizare s’esperièntzia acontzende s’immàgine e su sonu. In custu sentidu, sos sistemas de IA analizant s’ambiente in ue est postu su televisore e càlibrant s’àudiu in sa mègius cunfiguratzione. Semper e cando, sa mègius manera de ascurtare su chi narant in televisione est a impitare unu sistema ispetzìficu: sa cassa acùstica Bose Smart Soundbar chi impreat s’intelligèntzia artifitziale pro diferentziare sa boghe dae su restu de s’àudiu a manera de ascurtare mègius sos diàlogos.
RELÒGIOS E AURICULARES
Sa IA est finas cumintzende a s’implementare in àteras castas de dispositivu. Pro nàrrere, in sos relògios intelligentes. De fatu, amus giai bidu modellos che a Amazfit Active, chi ìntegrat su modellu de IA generativa GPT-4 de OpenAI comente assistente vocale, e chi agiuat finas a personalizare sos allenamentos in funtzione de cada persona.
Un’ùrtimu esempru de dispositivu cun IA: sos auriculares Pixel Buds Pro 2 cun Gemini. Bastat a nàrrere a boghe arta “Oh, Google, faeddemus in direta”, pro “ischidare” s’assistente e pro li preguntare cale siat cosa: dae sos inditos pro lòmpere a unu logu a sos crarimentos subra de su chi semus bidende, o cussìgios a pitzu de sèries de sighire o de mùsica de ascurtare, tenende contu de sas preferèntzias de s’usuàriu.
