«Perunu de nois est indipendentista ma s’Istadu est traballende pro una Sardexit». Faeddos de sos cumponentes de sa Cummissione ispetziale pro su reconnoschimentu de s’insularidade in Costitutzione, est a nàrrere de su presidente Michele Cossa (Riformatori) e de sos cummissàrios Eugenio Lai (LeU), Dario Giagoni (Lega), Giovanni Satta (Psd’Az), Francesco Agus (Progressisti), Angelo Cocciu (Forza Italia), Roberto Li Gioi (M5s), Antonello Peru (Udc-Cambiamo), Giuseppe Meloni (Pd), Nico Mundula (Fdi) e Roberto Caredda (Gruppo misto). Ite pedint sos cumponentes de sa cummissione, chi in s’ìnteri cherent un’addòbiu cun sos presidentes de sos grupos de su Senadu? Chi in intro de sa legisladura su Parlamentu aprovet sa proposta de initziativa populare pro chi sa Costitutzione reconnoscat su printzìpiu de insularidade e su disegnu de lege in contu de cumpensatziones. Sa cummissione Afàrios costitutzionales in Roma aiat aprovadu su testu s’atòngiu de s’annu coladu ma si discussione in àula galu sunt a la calendarizare. Ma custa Sardexit, tando? Ite ant a fàghere sos riformadores e sos àteros chi ant regortu sas firmas peri sa Sardigna? Ant a cuntatare totu custa gente pro un’assemblea generale, o territoriales, pro su “da farsi” o ant a apeddare a sa luna pagu prus o mancu comente ant fatu cun sas provìntzias torradas a pònnere a pustis de unu referendum in pompa magna? Ma, mescamente, cando est chi ant a faeddare de Istatutu nou?
màuru piredda
Leave a comment