Festare sos sessantases annos sa matessi die chi ti nche leant a reclusione no est su màssimu de sa vida pro nemos. Podimus pensare pro unu prìntzipe de sa famìlia Mountbatten-Windsor de Inghilterra. In unu fritu mangianu de ierru, su 19 de freàrgiu, Andria est istadu arrestadu dae sa politzia de sa Thames Valley, incurpadu de abusu de ufìtziu (misconduct in public office) pro unu reatu chi tenet ligàmenes cun su casu Epstein.
A sas 8 de mangianu, sos agentes l’ant firmu in Wood Farm, sa residèntzia de sas tancas de Sandringham, in ue s’ex duca de York aiat furriadu a primos de freàrgiu, custrintu a s’istresiare a mala gana dae su Royal Lodge. Segundu su chi iscrient sas agentzias de imprenta, dae sos “Epstein files” – milliones de documentos publicados dae su Dipartimentu de Giustìtzia americanu – sas indàgines punnant a connòschere sa cundota de Andria cando teniat sa gàrriga de imbiadu ispetziale pro su cummèrtziu internatzionale (2001-2011). Sos magistrados sunt cumbintos chi s’ex prìntzipe apat cumpartzidu informatziones guvernativas segretas e tratantzias cummertziales de cunfiàntzia cun su finantzieri Jeffrey Epstein, mortu in presone in su 2019.
A preocupare sa corona sunt maigantas email imbiadas in su 2010 chi interessant sas missiones ufitziales in Asia (Hong Kong, Vietnam e Singapore). Buckingham Palace at dadu a ischire, cun una nota, su pensamentu ufitziale de su re Càrulu III, chi giai in su mese de Santu Gaine del su 2025 aiat bogadu a su frade cale si siat tìtulu e su tratamentu de “Artesa reale”: “Sa lege – at naradu su soberanu – depet fàghere su tretu sou. At a sighire unu protzessu comente si tocat, pro mèdiu de sas autoridades cumpetentes”. Pro su Rennu Unidu est unu momentu istòricu: su fìgiu de su coro de Elisabeta II est diventadu sa birgòngia de domo Windsor: est sa prima pessone de sa famìlia reale chi in època moderna apat retzidu sos fèrros de presone.
Bobore Taras
Leave a comment