A pustis de àere bintu su prèmiu comente su mègius filmi in sa de XIII editziones de su cuncursu natzionale Roberto Gavioli, organizadu dae su Museo dell’industria e del lavoro de Brescia, su mediumetràgiu de Daniele Atzeni Inferru at bintu finas su prèmiu a su mègius filmi in su Beijing International Short Film Festival de Pechinu.
Atzeni, nàschidu in Biddecrèsia in su 1973, s’est diplomadu in sa Nuova Università del Cinema e della Televisione di Roma e est regista de documentàrios e curtzumetràgios.
Inferru est su contu de unu minadore vìtima de un’intzidente in una miniera sarda chi dat su nùmene a sa pellìcula. S’òpera est istada realizada impreende immàgines de archìviu.
Sa matessi tècnica su regista dd’aiat usada pro I morti di Alos, essidu in su 2011 in duas versiones, sardu e italianu. A metade caminu intre fintzione e documentàriu contaiat de un’òmine, Antonio Gairo, ammentende sa bidda sua, Alos, ma in realidade Gairo etotu, abbandonada totu in unu dae sa gente chi ddoe biviat.
In ambas duas pellìculas a tènnere unu ruolu de protagonista, in negativu, est sa modernidade, chi in Sardigna, pro su prus cun s’industrializatzione, at cajonadu dannos econòmicos ma massimamente sotziales, causende sa pèrdida de un’identidade colletiva rapresentada tràmite sa maladia de sos duos personàgios printzipales.
Inferru est produidu dae sa Araj Film cun s’agiudu de sa Società Umanitaria – Cineteca Sarda e de sa Associazione Culturale Babel, in collaboratzione cun sa Associazione Paesaggi di famiglia e cun su Archivio Audiovisivo del Movimento Operaio e Democratico.
Su testu est de Atzeni etotu, traduidu in sardu dae Ivo Murgia e lèghidu e interpretadu dae Giorgio Pinna. Sas mùsicas e sos efetos sonoros sunt de Stefano Guzzetti.
Inoghe est possìbile bìdere un’antitzipatzione de sa pellìcula.
(gianni muroni)
Leave a comment