In custas dies est in programmatzione in sos tzìnemas sardos s’ùrtimu filmi de su regista tataresu Bonifacio Angius, I Giganti.
Tàtari, Casteddu e Nùgoro dae su 18 a su 20 de santugaine, in sos tzìnemas Moderno, Odissea e Eliseo ant ofertu s’anteprima sarda de sa pellìcula in antis de sa proposta normale a su pùblicu, a partire dae sa fine de chida.
S’òpera est seletzionada in sa categoria de sos filmis istràngios pro sos prèmios Oscar de ocannu chi benit e at bintu su prèmiu pro sa mègius regia e sa mègius pellìcula pro sa giuria giòvanos in su Annecy Cinéma Italien Film Festival. In prus est istada s’ùnica pellìcula a rapresentare s’Itàlia in su Festival de Locarno de su 2021.
Su regista at chertu sutaliniare sa mancàntzia de figuras feminiles, chi abarrant in su fundu de sa narratzione, pro pònnere suta acusa sos òmines, ogetu de sa crìtica sua.
Sos intèrpretes sunt Angius etotu, in su ruolu de protagonista, Stefano Deffenu, chi at iscritu paris cun Angius s’iscenegiadura, sos frades Stefano e Michele Manca, Riccardo Bombagi, Stefania Niedda, Noemi Medas, Roberta Passaghe, Mila Angius. Sa colonna sonora est de Luigi Frassetto.
A prus de sa programmatzione sarda est prevista sa tzirculatzione in sas salas tzinematogràficas de totu s’Itàlia, a cumintzare dae su 21 de santugaine.
Bonifacio Angius, 39 annos, est a sa de oto pellìculas comente regista. At esordidu in su 2005 cun su curtzumetràgiu Ultimo giorno d’estate. In su 2011 cumintzat a èssere connotu, cun Sa Grascia, àteru curtzumetràgiu.
In su 2014 at realizadu su primu longumetràgiu, Perfidia. Su caminu filmogràficu est sighidu cun àteros curtzumetràgios e cun Ovunque proteggimi, de su 2018, finas a arribbare a custa ùrtima pellìcula.
Sa produtzione est de Sardegna Film Commission e de Il Monello Film, sa sotziedade de produtzione de Angius.
(gianni muroni)
Leave a comment