Su 29 e su 30 de làmpadas de ocannu, 258 giòvanos talentos de sa seguresa informàtica s’ant a disafiare in Torinu pro sas finales de CyberChallenge.it, su programma italianu de annestru de cyberdefender pro sos istudiantes de sas iscolas superiores e de sas universidades. Sa manifestatzione – de grandu giudu fintzas pro s’iscumprou de sas connoschèntzias in custu campu islacanadu – est lòmpida a sa de sete editziones interessende ocannu 860 pitzocos de totu Itàlia intre sos 16 e sos 24 annos.
Su 29, in su campus torinesu de s’Ilo (s’Organizatzione internatzionale de su traballu), sos “hacker èticos” ant a dèvere, duncas, isfrutare totu sas connoschèntzias issoro in contu de critografia e seguresa de sas retes e de sas infrastruturas hardware e software. A sos cuncurrentes los ant a partzire in iscuadras, una pro cada una de sas 43 sedes chi ant pigadu parte a su programma (40 de custas sunt universidades).
Su 30, sas mègius 8 iscuadras de sa gara ant a dèvere espònnere sas presentatziones divulgativas issoro in contu de seguresa informàtica in cara de una giuria fata dae istitutziones, espertos de comunicatzione e unu rapresentante de Area, Bip, Gruppo BV Tech, Capgemini, Cisco, Cybertech, IPS, Leonardo, Pirelli, Telsy, Zte. Sos pitzocos cun sos mègius resurtados ant a pòdere èssere cunvocados pro pigare parte a su TeamItaly, s’iscuadra natzionale de cyberdefender chi annu cun annu partètzipat a s’European cybersecurity challenge (e chi ocannu, su mese de santugaine, l’ant a fàghere in Hamar, Norvègia).
S’initziativa de su 29 e de su 30 est aprontada dae su Cybersecurity national lab de su Cini (Cunsòrtziu interuniversitàriu natzionale pro s’informàtica), cun su patrotzìniu de s’Acn, s’Agentzia pro sa cyberseguresa natzionale e de s’Autoridade garante pro sa protetzione de sos datos personales.
Gianfranca Orunesu
Leave a comment