Verba volant scripta manent, gasi narant sos latinos e tando bisòngiat de pònnere a banda sas parlatas de sos polìticos in chirca semper de cunsensu e andare a su chi iscriet su guvernu in sos documentos ufitziales. E in ie non s’agatat nudda a subra de “sostitutzione ètnica” o àteros issollòrios cumplotistas. In su Documentu de Economia e Finantzia, difatis, si faeddat de immigratzione comente a una manera de sarvare sos contos e sos còmodos chi amus.
In custa pàgina de su guvernu (inoghe) si narat craru chi sa manera de sarvare sos contos pùblicos est de dare carchi agiudu a sas famìllias pro fàghere nàschere carchi pitzinneddu in prus, ma in su matessi tempus narat chi, como chi est como, serbint prus immigrados. S’Ipòtesi iscrita in su DEF faeddat de 213 mìgia de immigrados a s’annu comente isetu e ispera. S’annu coladu est istada nemmancu su mesu. Una crèschida de sos istràngios chi intrant in su Paisu de su trintatrès pro chentu pro fàghere minimare su dèpidu prus in presse. Tando s’immigratzione, pro su documentu de su guvernu, cumbenit e meda puru. Sunt nùmeros chi sunt artos meda de prus de sos chi amus como, sos chi ant fatu pedire s’Istadu de emergèntzia.
E tando ite est capitende? Oramai fintzas pro sa dereta est craru, a su nessi cun su pensu, chi s’immigratzione est una netzessidade, si si cherent sarvare s’economia e sa calidade de vida. Però non si podet nàrrere, ca s’Itàlia non lu cheret intèndere e sos eletores ant votadu custa majoria pro minimare s’immigratzione. In prus sa dereta non bi la faghet de a beru a traire gasi meda s’ideologia sua. Però su seberu abarrat: dae un’ala s’ideologia e su cunsensu, dae s’àtera su bene de s’Istadu.
Gabriele Tanda
Leave a comment