At a èssere sa Sardigna a ospitare, dae su 5 a s’8 de cabudanni, s’Hackathon Camp 2022, eventu de importu mannu dedicadu a s’isvilupu agrìculu, promòvidu dae su Ministeru de sas polìticas agrìculas, alimentares e forestales, e organizadu dae sa rete rurale natzionale cun su Crea politiche e Bioeconomia, in collaboratzione cun sa Regione Sardigna e partner vàrios.
S’hackathon in chistione (est a nàrrere un’addòbiu in ue partètzipant espertos informàticos) previdit bator dies de formatzione, elaboratzione, dibatas e connoschèntzias cumpartzidas, pràticas bonas e esperièntzias intre sos chi si interessant de isvilupu rurale. No est de badas chi ocannu s’eventu at a èssere in sa Nurra, territòriu caraterizadu dae un’istòria a vocatzione agrìcula e esperièntzias de impreu de sos finantziamentos PSR.
Su progetu – cun 46 istudiantes, 24 universidades e 11 regiones, in prus de sos imprendidores agrìculos e de sos professionistas – at s’obietivu de favorire s’acuisitzione de cumpetèntzias e isperimentare istrumentos didàticos noos chi permitant a sos giòvanos de traballare paris cun sas istitutziones e a sas universidades pro su chi pertocat sos problemas aziendales promovende, a su matessi tempus, s’orientamentu a s’innovatzione e a su problem solving.
Gianfranca Orunesu