In unu panorama mediorientale marcadu dae sa distrutzione bèllica israeliana, paret chi si siat aberende unu canale de isperu pro sos partziente oncològicos de Gaza. Pro mèdiu de s’Istitutu Gustave Roussy, sa Frantza est valutende una collaboratzione istratègica cun su guvernu egitzianu pro garantire curas ispetzialìsticas a chie, oe, est abarradu sena assistèntzia. Su ministru de sa Salude de Su Càiru Khaled Abdel-Ghaffar e s’ambasciadore frantzesu Éric Chevallier si sunt bidos pro unu pianu pro s’assignatzione de postos letu in sa filiale egitziana de su tzentru oncològicu frantzesu pro una fase, comintzende, de ses meses. S’initziativa est a primu indiritzada a sos pitzinnos e a sas urgèntzias prus mannas, cun possibilidade de trasferire sos malàidos prus graves in sa tzentrale frantzesa de Villejuif, chi est mentovada comente su mègius tzentru oncològicu de Europa. Su coordinamentu de s’operatzione est istruturadu de custa manera: su ministeru egitzianu seletzionat sos casos clìnicos in pare cun s’OMS, sa Mesaluna Ruja e sas autoridades sanitàrias de su Sinai de su Nord. Sos nùmeros sunt unu corfu o su coro. Cunforma a su chi narant sas organizatziones sanitàrias palestinesas, sunt belle 11mìgia sos patzienti in Gaza privos de atzessu a diàgnosi e terapias ispetzialìsticas. De custos, 4mìgia sunt isetende unu trasferimentu dae prus de duos annos, vìtimas non de sa gherra ebbia ma fintzas de sa burocratzia. Dae su comintzu de sas ostilidades, s’Egitu at giai acollidu mìgias de feridos e malàidos crònicos, ma s’intrada in su campu de un’istrutura de fama mundiale comente su Gustave Roussy diat pòdere marcare unu brincu de calidade. Custu acòrdiu rapresentat un’esèmpiu de cooperatzione internatzionale. Ma non devìamus isetare custu massacru. Nen podìamus istare abbaidende·lu.
mauro piredda
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment