Chentu e unu annos a oe naschiat s’Unione de sas repùblicas sotzialistas sovièticas. La proclameit su primu cungressu de sos soviet chimbe annos a pustis de sa rivolutzione. A comintzu bi faghiant parte petzi sa russa, sa bielorussa, s’ucraina e transcaucàsica; su ’24 si partzeint dae sa Rùssia sas repùblicas sovièticas turkmena e uzbeka; su 29′ sa regione autònoma uzbeka de su Tagikistan si fùrriat a repùblica soviètica issa puru; su ’36 sa repùblica transcaucàsica si partitz in tres (armena, azera e georgiana) e in prus naschent dae intor de sa repùblica russa sa kazaka e sa kirghiza; su ’45 nch’intrant a s’Unione sas bàlticas e sa moldava; su ’54 sa Crimea est parte de sa repùblica soviètica ucraina. S’Unione, a comintzu, teniat pro innu s’Internatzionale e medas fiant sas limbas faeddadas. Un’istadu plurinatzionale cun sas repùblicas chi teniant su deretu de si nch’essire dae s’Unione. Una Unione in ue, mancari a bellu a bellu cun dipendèntzia totale dae Mosca (dae Mosca dipendiant fintzas sos àteros partidos comunistas de otzidente e totu sos àteros istados satèllite), sos russos fiant russos, sos ucrainos ucrainos e gasi sighende. S’in casu totu sovièticos. Custa fiat s’idea a comintzu. Ca peruna idea grandu russa isciovinista b’aiat in Lenin. Chi no est de badas bidu male dae Putin.
redatzione
Leave a comment