Sa Plataforma per la Llengua denùntziat chi s’Istadu ispagnolu s’annu coladu at aprovadu 218 normas chi agiuant s’impreu de su castiglianu e ponent a un’ala su catalanu. Custu nùmeru rapresentat un‘aumentu de su 13,5% cunforma a su 2023, cando sunt essidas a campu 192 normativas cun clàusolas linguìsticas discriminatòrias.
Sas normativas aprovadas s’annu coladu pertocant campos diferentes meda, comente sas dimandas de cuntributos, sa redatzione de istrutziones pro dispositivos eletrònicos (televisores, telefoneddos e elaboradores), sa valutatzione de sas limbas in sos tzentros educativos ispagnolos in logu istràngiu, in ue no ant permissu sa valutatzione in catalanu.
In s’ùrtimu trimestre de su 2024 ant aprovadu 54 normas de custa casta, chi s’annanghent a sas 71 de su de tres trimestres, a sas 59 de su segundu e a sas 34 de su primu. Unu de sos campos prus interessados est su de sas suventziones e prèmios pùblicos, in ue ant impostu s’impreu de su castiglianu in sas dimandas, e finas in sa documentatzione acreditativa e in sas òperas candidadas a sos prèmios.
Sa Plataforma per la Llengua narat chi su fatu chi su catalanu non siat una limba ufitziale ne in s’Istadu ispagnolu ne, pro como, in s’Unione Europea, gènerat una situatzione de disegualidade giurìdica. Custa organizatzione crarit chi sa costitutzione ispagnola imponet a totu sos tzitadinos su dovere de connòschere su castiglianu e chi petzi permitit chi sas àteras limbas pròpias de s’Istadu ispagnolu siant ufitziales in sos territòrios respetivos issoro, ma no in sas istitutziones generales.
“Custa disegualidade giurìdica intre su catalanu e su castiglianu faghet a manera chi finas sa legislatzione cun finalidade egualitària non podet instaurare unu tratu perfetamente ecuitativu intre sas duas limbas,”, narat sa Plataforma per la Llengua.
Pro fàghere un’esempru, mentovat sa lege orgànica 4/2024 de su deretu de defensa, chi l’ant aprovada a primos de santandria de su 2024, cando sa Plataforma at presentadu emendamentos e at agiuadu sos partidos a la defensare durante sa negotziatzione. Custa lege rapresentat unu progressu mannu, ca permitit de impitare su catalanu in totu sos tribunales de s’Istadu ispagnolu, in mesu de sos cales su Tribunale Supremu (TS) o s’Udièntzia. Belle gasi, s’entidade narat chi su deretu de impreare su castiglianu est incunditzionadu e non rechedet peruna giustificatzione.
